Sápmi |

Sanila-Aikio ođđa plánejuvvon ráđđehusas: "Doppe leat ministtarin seamma olbmot, dat veahkeha olu"

Disdaga Suoma ráđđehus goasii gopmánii, muhto vuođđosuopmelaččaid bellodat rahtasii guovtte oassái. Ođđa bellodahkii vulge earret eará buot VS ministtarat. Ođđa molssaeaktu -bellodaga vejolaš loktaneapmi ráđđehussii sáhttá leat buorrin sámeáššiid dikšumii.

Tiina Sanila Aikio
Govva: Rosa-Maren Magga / Yle

Disdat lei hui miellagiddevaš beaivi Suoma politihkas. Iđđes vuordámuššan lei, ahte ráđđehus gopmána ja leihan Suoma stáhtaministtar juo mátkki alde presideanta lusa doalvut earrobivdaga, go jorggihii ruovttoluotta.

Buot dát álggii das go lávvordaga vuođđosuopmelaččaid bellodahkii válljejuvvui ođđa ságajođiheaddji Jussi Halla-Aho. Vuođđosuopmelaččat ledje Suoma ráđđehusas ovttas Olgešbellodagain ja Guovddášbellodagain. Maŋŋel go Halla-Aho válljejuvvui vuođđosuopmelaččaid jođiheaddjin šattai nu gohčoduvvon ráđđehuskriisa go olgeš ja guovddáš eai háliidan šat ovttasbargat vuođđosuopmelaččaiguin ráđđehusas.

Disdaga vuođđosuopmelaččain lei riikabeijoavkku čoahkkin, man boađusin bellodat rahtasii. Oassi vuođđosuopmelaččain vulge bellodagas ja dahke ođđa bellodaga ”Ođđa molssaeaktu”. Earret eará buot ministtarat manne dán ođđa bellodahkii. Dál olgeš ja guovddáš pláneba ráđđehusovttasbarggu dainna Ođđa molssaeaktu -bellodagain.

Veahkeha olu go ministtarin leat seamma olbmot go ovdal

Sámedikki ságajođiheaddji Tiina Sanila-Aikio oaidná, ahte dat veahkeha olu, ahte ráđđehusas livčče seamma ministtarat.

– Dan ferte muitit, ahte doppe leat ministtarin seamma olbmot dat veahkeha olu, ii dárbbat álggu rájes álggahit áššiid ja vuođuštit maiddái daid proseassaid, mat leat dál jođus, lohká Sanila-Aikio.

Vaikko álggahuvvon áššiid galggašii dál bastit doalvut ovddosguvlui, nu goittotge hástalusat sáhttet dán ođđa riikabeaijoavkkus leat.

– Mu áddejumi mielde mii joatkit dál daid áššiid ovddosguvlui doalvuma, mat leat álggahuvvon dasto dieđusge hástalussan boahtá sihkkarit leat dat, ahte go dat joavku lea beali unnit go ovdal de mot dat gerget ja bastet čuovvut buot áššiid, mat dáhpáhuvvet ja dieđusge dan oktavuođas soaitá leat nu, ahte sámeáššit leat marginálas ja dat báhcet dasto stuorit bellodagaid ovddasvástádussan, Sanila-Aikio lohká.

Sávvá ođđa ráđđehusa čoavdit áššiid johtileappot

Sanila-Aikio lohká maid, ahte son gáibida dan, ahte olles ráđđehus lea sámeáššiid duohken ja ahte dat lea uhcimus maid dán dilis sáhttá vuordit. Son maid sávvá, ahte ođđa ráđđehus gos dát ođđa molssaeaktunai vejolaččat lea, bastá buorebut ja johtileappot čoavdit áššiid.

– Mun sávan, ahte dál dát joavku bastá buorebut čoavdit ja johtileappot čoavdit áššiid, ahte ii juohke áidna ođđa dilis leat eahpesihkkaris vuođu alde dat, ahte joatkitgo mii vai ii. Dat lea namalassii čuohcán sámeáššiide diená, ahte leat leamašan dakkár akuhta áššit čoavdinláhkái ja albma bargui eat leat beassan easkka go dál guovtti jagi barggu maŋŋá, lohká Sanila-Aikio.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä