Sápmi |

Sanila-Aikio ráđđehuskriissas: Sámeáššit eahpesihkkaris vuođu alde

Guovddášbellodaga, olgešbellodat Kokoomus ja Vuođđosuopmelaččaid ráđđehus lea gopmáneamen. - Galhan dat stuorra ášši lea midjiide, ahte dat bargu man mii leat bargan lea bargojuvvon duššin, dadjá Sámedikki ságadoalli Tiina Sanila-Aikio.

Stáhtaminister Juha Sipilä ja Sámedikki ságadoalli Tiina Sanila-Aikio 5.5.2017.
Stáhtaminister Juha Sipilä ja Sámedikki ságadoalli Tiina Sanila-Aikio 5.5.2017. Govva: Valtioneuvosto

– Mii leat juste ožžon sámeáššiid johtui dáinna ráđđehusain ja dasto jos dat gopmána, dat lea hirpmat stuorra ášši. Sámeáššit leat álbmogii ja boahttevuođa dáfus hirpmat dehálaččat ja dat leat dál hui eahpesihkkaris vuođu alde, oaivvilda Sámedikki ságadoalli Tiina Sanila-Aikio ráđđehuskriissas.

Dálá ráđđehusain jođus leat leamaš olu sámeáššit. Dál beavddi alde leat ovdamearkka dihte ILO169 -soahpamuša ratifiseren, davviriikalaš sámesoahpamuš ja ođđaseamos áššin duohtavuohta- ja soabadanproseassa álggaheapmi ja sámediggelága ođasteapmi.

– Okta hui stuorra maiddái sámiide guoskevaš ášši, mii riikkadásis lea stuorra ášši lea eanangodde- ja sosiála- ja dearvvašvuođaođastus, muitala Sanila-Aikio.

Guokte jagi ovttasbargu duššái?

Sanila-Aikio lohkáge, ahte sii leat dál ovttasbargan guokte jagi dáinna ráđđehusain ja leat bargan vuođu, vai sáhtášedje álggahit daid proseassaid.

– Doppe leamašan juo dat sámeáššit siste ja daiguin leat bargan ja mii leat oaidnán, mo lea geavvan, de galhan dat stuorra ášši lea midjiide, ahte dat bargu man mii leat bargan lea bargojuvvon duššin.

Presideanta Niinistö ráđđehuskriissas: Álggos viggat oažžut áigái ođđa ráđđehusa dálá riikkabeivviin

Presideanta Sauli Niinistö muitala Yle Ođđasiin , ahte sávvá ođđa ráđđehusa čohkkema nu johtilit go vejolaš.

– Áššit leat dál Helssegis ráđđehusbellodagaid ja stáhtaministtara gieđain, Niinistö kommentere Yle Ođđasiidda.

Niinistö oaivvilda, ahte jos ráđđehus gopmána, viggat ođđa ráđđehusa čohkket dálá riikkabeivviiin.

– Gal min vuođđolága vuoigŋa vuolgá johtui das, ahte jos ráđđehus bieđgana, bellodagat isket geahččat gávdnogo juoga nubbi čoakkádus dain riikkabeivviin, mat goasge čohkkájit. Riikkabeivviid bieđganeapmi dahje biđgen lea olu garrasut lihkastat go dušše ráđđehusa gopmáneapmi, muittuha Niinistö.

Ráđđehus lea gopmáneamen go olgešbellodat Kokoomus ja Guovddášbellodat eai hálit joatkit ovttasbarggu Vuođđosuopmelaččaiguin. Gažaldat ovttasbarggu joatkimis šattai áigeguovdilin, go Jussi Halla-aho válljejuvvui lávvardaga Vuođđosuopmelaččaid ságadoallin.

Beaividuvvon 13.6. dbm 12.17 - lasihuvvon Tiina Sanila-Aikio kommeanttat.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä