Sää´mjânnam |

Sanila puäʒʒtäälast šõõddi määtklai tobddum kueʹsspõrtt – ââʹn Toini Sanila niõǥǥõõzzin seenn jeältõkpeeiʹv da tääll lij kaaupšemnalla

Kirakkajääuʹrest Aanrest 34 eeʹjj tuåimmam Porotila Toini Sanila lij piijjum kaaupšemnalla mõõʹnni ǩeâđđa.

Matkailuyrittäjä Toini Sanila.
Govva: Sara Wesslin / Yle

Kirakkajäuʹrr Tän ruõʹpsses põʹrtte Toini Sanila siʹrddi jälsted 80-lååǥǥast. Son tuåimi teʹl uʹčteeʹlen Čeʹvetjääuʹr škooulâst da välddjõõvvâm puäʒʒooumaž Taannâl Sanilain. Teʹl eeʹjjest 1985 Sanilai jieʹllem mottji nuuʹbb årra.

– Tän põõrtâst mij jälstim tõn muäʹdd eeʹjj, ko vuäǯǯaim jieʹlled õõutâst. Muännast leʹjje kueʹhtt päärna da kuälmad mon vuõʹrddem, ko Taannâl teʹl jaaʹmi ǩueʹǩǩel, mušttal Toini Sanila Sanila-puäʒʒtääl šeelljast.

Ko piârrja šõõddi jõnn peʹccel, feʹrttji še piʹrǧǧummuš smiõttâd oʹđđest. Tõn ääiʹjest ääʹljeeʹl Toini Sanila tuåimškuõʹđi siõmmnai siõmmnai turiismpõrggjen.

Sanila šeellj äitta raʹjješ muäʹdd riicc innsâjjen da vueʹss määtklain vueʹđđe še seämma laaǥǥ vueʹlnn dommpõõrtâst.

Ââʹn 34 eeʹjj mâŋŋa Porotila Toini Sanila lij kaaupšemnalla, ko põrggi haalâd piâssâd kuddnalla jeältõʹǩǩe.

– Kuʹǩǩ leäʹp tän ääʹšš smiõttâm. Vuõššân smiõʹttem joba kääuʹc eeʹjj tõn, što lij-a jiijj piârrjest jueʹtǩǩi. Siõmmnai siõmmnai puõʹđi ouʹdde, što niõʹđin lij jiiʹjjes jieʹllem da juurd, nuʹtt ââʹn lij äiʹǧǧ ooccâd jueʹtǩǩi jeeʹres sââʹjest, särnn Sanila.

Matkailuyrittäjä Toini Sanila.
Govva: Sara Wesslin / Yle

Juʹn tän räjja miâlggâd 35 ekksaž puäʒʒtääll lij ǩiõssum oummui miõl. Pääiʹǩ lie jeällam ǩiõččmen jo-ba ålggriikkin, Ǩiinast da Indiast. Kaaupšummuž hoiʹddai ǩiiddâlmkaaupšeei.

Toini Sanila tuâivv, što puõʹtti põrggi väldd lokku vuuʹd määŋgpeällsažvuõđ.

– Tän peeiʹv määtklaž kaiʹbbai rääuh da takai jieʹllem. Takai arggääʹššin määtkla nuʹt Lääʹddjânnmest ko še ålggriikkin vuäǯǯa sami jiânnai. Ij kannat okkned mij arggjieʹllem, kulttuur da tuâjaid, peʹce tuõsttlõnji puʹhtted ouddân mij fijnn arggjieʹllem aaʹššid.

Vuuʹd jieʹllemvueʹjj lie säʹltt Čeʹvetjääuʹr da Njauddâm tuʹriiʹsme

Jieʹllem õhttu põrggsen iʹlla pâi leämmaž hiâlpp. Toini Sanila mušttal, mäʹhtt veiddnam puäʒʒtallu õhttââvv jiânnai jeeʹresnallšem muuʹšt. Iiʹjji mieʹldd tääiʹben lie jeällam jiânnai ääʹššla pirr maaiʹlm da nuʹtt hääʹrves lij pääccam miõʹlle hueʹnes miõlin.

Iiʹjji smiõttmõõžž mâŋŋa kuuitâǥ jeältõkpeeiʹvid son vääldče vuâstta.

Jietna: Põrggi Toini Sanila alttii puäʒʒtääl miâlggâd 35 eeʹjj mââiårra tõn mâŋŋa, ko piârrjest šõõddi jõnn peʹccel.

– Pââimõs juʹrdd lij, što pââstčem leeʹd nuʹt jiânnai päärnai päärnaivuiʹm, ko pâi lij vueiʹtlvaž. Da teâđast jiijjân päärnaivuiʹm. Haaʹlääm maatkčed da lookkâd ǩiiʹrjid.

Čeʹvetjääuʹr da Njauddâm vuuʹdin riʹjttai eeʹjjest nobba jooʹttjid da määtklaid. Rääi-jååʹttem lij lâssnam vuuʹd kääzzkõõzzid da turiism. Veâl uʹcc päiʹǩǩkååʹdd turiism lij rääuhlaž da jåått luâđ ryytm mieʹldd.

Sanila tuâivv, što puõʹtti ääiʹjest puk jieʹllemvueʹjj da põrggi vueiʹtte pååssad õõutâst.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä