Sápmi |

Sápmái háliidit rájáid rasttildeaddji skuvllaid – "Sámemánáide galggašii leat buoret vejolašvuohta nannet gielaset"

Čielga beroštupmi ja hállu ovttasbarggu ordnemii gávdno miehtá Sámi, dasgo dál sámeoahpahus báhcá dávjá oktasaš rávesolbmuid bargonoađđin, gávnnaha bargojoavku.

Inger Anne Klemetsen, Mikkel Eskil Mikkelsen, Torkel Rasmussen, Leif Erik Varsi ja Arla Magga
Rájáhis sámeoahpahus -bargojoavkku jođiheaddji Inger Anne Klemetsen, Norgga sámediggeráđđi Mikkel Eskil Mikkelsen, ja bargojoavkku lahtut Torkel Rasmussen, Leif Erik Varsi ja čálli Arla Magga raportta almmustahttindilálašvuođas Kárášjogas 4.12. Govva: Sámediggi / Sametinget

Sápmái háliidit rájáid rasttildeaddji skuvllaid. Daidda lea dárbu, daningo sámemánát ja -nuorat galggašedje sáhttit nanosmahttit gielaset, identitehtaset ja kultuvrraset oahpu bokte beroškeahttá riikkarájáin, čájeha varas čielggadeapmi.

Sámi parlamentáralaš ráđi ásahan bargojoavku lea vássán jagi áigge čohkken dieđuid oahpahusovttasbarggu diliin ja dásiin Sámis. Rájáhis sámeoahpahus -bargojoavku buktáge dál loahpparaporttastis ovdan doaibmabijuid, maiguin mánáidgárddit ja skuvllat sáhtášedje álggahit ja ovddidit rájárasttildeaddji oahpahusovttasbarggu.

Rájáid rasttildeaddji ovttasbargui lea bargojoavkku mielde dárbu danin, go sámegiela geavaheapmi lassána ja ealáska Sámis. Bargojoavkkus oaivvilditge, ahte sámiide guoskevaš oahppopolitihkka lea juohke riikkas iežaslágan ja dat lea darvánan stáhta struktuvrraide.

– Sápmái dárbbašuvvo oahpahus, mii vuođđuduvvá álbmoga iežas višuvnnaide ja vuoruhemiide, bargojoavku gávnnaha raporttastis.

"Máŋgasat hálidivčče ollašuhttit ovttasbarggu"

Rájáhis sámeoahpahus -bargojoavkku loahpparaportta várás leat jearahallon oahpaheaddjit, rektorat, skuvlahoavddat ja eará áššedovdit, geat barget sámeoahpahusain.

Máŋggat skuvllat leat čielggadeami vuođul bargan ovttasbarggu goit juoga veardde, ovdamearkka dihtii ordnen temábeivviid ovttas nuppi skuvllain. Prošeavtta čállin doaibman Arla Magga Suoma Sámedikkis diehtá, ahte guhkes gaskkaid dihte ovttasbarggu soaitá leat hástaleaddji ordnet.

– Muhto jus skuvllat leat lahkalagaid, dalle de sáhtášiige leat vejolaš, muitala Magga.

Okta buorre ovdamearka lihkostuvvan oahpahusovttasbarggus lea bargojoavkku mielas Ohcejoga ja Sirpmá skuvllaid ovttasbargu, man dat gohčodage ovttasbarggu ofelažžan.

Arla Magga kasvokuva
Bargojoavkkus čállin doaibman Arla Magga lohká, ahte skuvllaid rájáid rasttildeaddji ovttasbargui gávdno dárbu ja dáhttu. Govva: Vesa Toppari / Yle

Čielga beroštupmi ja hállu ovttasbarggu ordnemii gávdno čielggadeami mielde miehtá Sámi, sihke vánhemiin ja oahpaheddjiin, dasgo dál sámeoahpahus báhcá dávjá oktasaš rávesolbmuid bargonoađđin.

– Mii leat gávnnahan, ahte máŋgasat hálidivčče ollašuhttit ovttasbarggu, Arla Magga čilge.

Vánhemat ja oahpaheaddjit sávvet, ahte dákkár ovttasbargu huksejuvvo fásta doaibman.

Bargojoavku árvala stuorat prošeavtta, mii guorahalašii vejolašvuođaid

Oktan doaibmabidjun bargojoavku evttoha, ahte Norgga Sámediggi álggahivččii váldoprošeavtta, mii guorahalašii, makkár vejolašvuođat ja eavttut rájáid rasttildeaddji skuvllaid vuođđudeamis leat.

Bargojoavku árvala maiddái, ahte skuvllaide ja giellaguovddážiidda vuođđuduvvošedje ovttasbargojoavkkut, mat sáhtášedje lágidit skuvlaáiggi olggobealde oktasaš doaimmaid, ovdamearkka dihte duodjekurssaid.

Bargojoavkku evttohusat gusket maid mánáidgárddiid ja joatkkaskuvllaid ovttasbarggu lasiheami. Oktan evttohussan lea ásahit verddeskuvllaid ja -oahpaheaddjiid, mat attášedje oahpaheaddjiide doarjaga ja rávvagiid, ja vejolašvuođa plánet ja bargat ovttas, digaštallat áigeguovdilis áššiin ja sámegiela, -didaktihka ja -pedagogihka birra. Maid oktasaš gáiddusoahpahusdárbbu galggašii raportta mielde guorahallat.

Sámi parlamentaralaš ráđi asáhan bargojoavkkus ledje mielde Norgga, Suoma ja Ruoŧa Sámedikkiid ovddasteaddjit ja Sirpmá-Ohcejoga skuvlaovttasbarggu ovddasteaddjit. Bargojoavkku jođiheaddjin barggai Inger Anne Klemetsen Norgga Sámedikkis ja čállin fas Arla Magga Suoma Sámedikkis. Bargojoavkkus ledje maid Ulla Aikio-Puoskari ja Eila Tapiola Suoma Sámedikkis, Laura Arola Ohcejoga gielddas, Jon Christer Mudenia Deanu gielddas, dutki Torkel Rasmussen ja vánhemiid ovddasteaddjit Aura Pieski ja Leif Erik Varsi.

Varrasamosat: Sápmi

Váldoođđasat

Varrasamosat

Muualla Yle.fi:ssä