Sápmi |

Sápmi levge odne duorastaga Elsa Laula Renberg gudnin

Elsa Laula Renberg riegádanbeaivi ávvuduvvo almmolaš leavgabeivviin dál nuppi háve.

Elsa Laula Renberg
Govva: Hilfling-Rasmussen/NTNU UB / Mårten Seiplax/ Yle

Odne skábmamánu 29. beaivve gessojuvvojit sámeleavggat stággui Elsa Laula Renberg riegádanbeaivvi gudnin.

Sámiid 21. konferánsa dohkkehii Elsa Laula Renberg riegádanbeaivvi ođđa virggálaš leavgabeaivin guovvamánus 2017, ja vuosttas háve beaivi levgejuvvui 29.11.2017.

Álgaga dán leavgabeaivái dagai Sámi Nisson Forum Sámiid 19. konferánssas 2015.

Renberg áŋgirušai sápmelaččaid ovttasbarggu ovdii

Máttasápmelaš aktivista, politihkkár ja nissonáššiid ovddideaddji Elsa Laula Renberg riegádii 29.11.1877 Vualtjere suohkanis Ruoŧa beale Sámis ja jámii tuberkulosai Musseres Norgga bealde jagi 1931.

Renberg barggai áŋgirit sápmelaččaid ovttasbarggu ovdii 1900-logu álggus, ja čohkkii sápmelaččaid vuosttas davviriikkalaš čoahkkimii Troanddimii, Norgga beale Sápmái guovvamánus 1917. Dan dihte ávvuduvvo Sámi álbmotbeaivi guovvamánu 6. beaivvi.

NRK Sámi dokumeantta Elsa Laula Renberg birra sáhttá geahččat dáppe.

Varrasamosat: Sápmi

Váldoođđasat

Varrasamosat