Sápmi |

"Sápmi Pride dahká buori unna Sámi gilážiidda" – Geahča govvagalleriija Anára Prides!

Buot áiggiid njealját Sápmi Pride -dáhpáhus ordnejuvvui vahkoloahpas Anáris. Lávvordaga ráidovázzimii oassálaste árvvu mielde 150–200 olbmo.

Sápmi Pride
Govva: Ville-Riiko Fofonoff / Yle

Anáris ordnejuvvui vahkoloahpas buot áiggiid njealját, Suoma beale vuosttas Sápmi Pride -dáhpáhus.

Duorastaga álgán ja gitta sotnabeaivái bistán Sápmi Pride váldodáhpáhus lei lávvordaga ráidovázzin Anára gili čađa. Vázzimii oassálaste badjel 150 olbmo.

Ordnejeaddji Anne Olli illuda, go nu máŋgasat serve dáhpáhussii.

– Mu mielas dat manai hui bures, das bázii gal hui buorre dovdu. Dieđusge go Ijahis idja lea seamma áigge de mun dihten, ahte datge buktá midjiide olbmuid.

Sápmi Pride
Anne Olli. Govva: Ville-Riiko Fofonoff / Yle

Anne Olli muitala, ahte ráidovázzimiid bokte sii háliidit čájehit, ahte queerolbmot leat dáppe ja sis galget leat seammalágan rievttit go earáinge.

– Dát dáhpáhus lei justa dat, maid mun ledjen háliidan. Mun lean hui ilus ja giitevaš buohkaide, muitalii Olli ráidovázzima maŋŋá.

"Čájehit ráhkisvuođa buot sámiide"

Seita Keskitalo bođii ráidovázzimii doarjut olmmošvuoigatvuođaid. Son illuda, go nu máŋggat earátge ledje jurddašan seammaláhkai.

– Mun lean hui ilolaš, ahte dáppe leat nu olu olbmot. Ii daga maidige vaikko arvá. Lean hui movtta.

Keskitalo ii leat ovdal oassálastán dákkár dáhpáhussii, ja dan dihte dat leige sutnje erenoamáš vásáhus.

– Lean Avvilis eret ja go dat Pride lei dál Anáris, de dieđusge bohten deike.

Seita Keskitalo
Seita Keskitalo. Govva: Linnea Rasmus / Yle

Dát lei vuosttas Pride-dáhpáhus maiddái Ánte Vejolai.

– Bohten Ijahis idjii ja go lea seamma áigge dat Sápmi Pride, de háliidin boahtit vázzit ja čájehit ráhkisvuođa buot sámiide.

– Sámisge buohkat galggašedje beassat leat dego leat. Dáppe mii sáhttit čájehit dan, ahte juohkehaš oažžu leat dakkár go lea.

Ánde Veijola
Ánte Veijola. Govva: Linnea Rasmus / Yle

"Dahká buori unna Sámi gilážiidda"

Ánne-Sire Länsman lei boahtán Sápmi Pridei ovttas iežas nieiddain. Su mielas lea hui somá, ahte Anáris ordnejuvvo dákkár dáhpáhus.

– Mun jáhkán dát dahká buori unna Sámi gilážiidda oaidnit dákkár ráidduid, go buohkat dárbbašit ráhkisvuođa. Ja ii dárbbaš oktage boahtit olggobealde dubmet, ahte gii oažžu ráhkistit ja gii ii, ja gean oažžu ráhkistit.

Son lea leamaš oktii ovdalge Pride-dáhpáhusas, Ski Prides Rukas.

– Dat ledje nu čeahpes olbmot doppe. Doppe lei hui suohtas dánsut ja doallat vehá feasttaid, bohkosa Länsman.

Lahja Eriksen, Ánne-Sire Länsman
Lahja Eriksen ja Ánne-Sire Länsman. Govva: Linnea Rasmus / Yle

Lahja Eriksenis ii lean mihkkege sivaid, manin son ii livčče boahtán báikki ala.

– Manin in livčče boahtán? Gal mun hálidan, ahte olbmot leat dásseárvosaččat. Mu mielas lea buorre, ahte dat boahtá oidnosii, ahte olbmot ožžot leat máŋggaláganat ja ráhkistit badjel rájiid mo háliidit, oaivvilda Eriksen.

"Ii dárbbaš heahpanit"

Bajimus dovddut, mat Anna Morottajas ledje olles dáhpáhusa čađa, ledje oktiigullevašvuođa dovdu ja lihkku.

– Dat, ahte oktii jagis sáhttá hállat maid beare dain olbmuiguin, geat áddejit. Ii dárbbaš čiehkat iežas spivkaságaid, ii dárbbaš maidege čiehkat dahje heahpanit, ahte in mun dán dajage go iihan dát leat heivvolaš dán heteromáilmmis ná dadjat.

– Bajimus dovdu lea dat lihkku dál, ahte lei dákkár beaivi, ahte oažžu leat ja dadjat aiddo nu go lea miella aiddo dál.

Anna Morottaja
Anna Morottaja. Govva: Linnea Rasmus / Yle

Anna Morottaja atná stuorra ášši dan, ahte Sápmi Pride ordnejuvvui vuosttas háve Anáris, su ruovttogilis.

– Gili buot olbmot oidnet maiddái sámemáilmmi girjáivuođa albmaláhkái, ii dušše báhpáris dahje ahte gos nu dat leat. Mii leat aiddo dál dás.

Dá dovddut Sápmi Pride -ráidovázzimis!

 

Varrasamosat: Sápmi

Váldoođđasat

Varrasamosat

Muualla Yle.fi:ssä