Sápmi |

Sápmi Pride lágiduvvo viimmat dán jagi: prográmmas earret eará panelaságastallan ii-binára gávtti birra

Diibmá koronadili dihte ii lean vejolaš čoahkkanit oktii ávvudit sámeservoša máŋggahámatvuođa. Dán jagi Sápmi Pride goittotge lágiduvvo Ohcejogas borgemánu álggus.

Sápmi Pride 2019.
Sápmi pride leavga libarda fas Ohcejogas borgemánu álggus Sápmi pride -dáhpáhusas. Govva: Håkon Sandmo Karlsen

Borgemánu 5.–8. beaivve arvedávgeleavggat libardit Ohcejogas Sápmi Pride -dáhpáhusas.

Sápmi Pride -dáhpáhusa prográmmas lea earet eará ráidovázzin, bargobájit, panelaságastallan ii-binára ja binára gávttiid birra ja open stage -eahket, muitala dáhpáhusa lágideaddji Pinja Pieski.

Sápmi Pride dáhpáhusbáikin lea Ohcejohka gilli ja Gieddemielli. Pieskii dáhpáhus lea mearkkašahtti.

– Lea gal hirbmat dehálaš gávnnahit dakkár sajiid ja olbmuid, ja gos ja geaiguin ii dárbbaš mange oasi iežas identitehtas čilget dahje ballat, ahte mo olbmot bohtet vuostáiváldit du ja reageret dutnje.

Pinja Pieski
Dán jagaš Sápmi pride -dáhpáhusa lágideaddji Pinja Pieskii dáhpáhus mearkkaša olu. Govva: Linda Tammela / Yle

Pieski: "Dieđusge sávan, ahte dat bohciidahttá ságastallama ja áššit mannet ovddos guvlui"

Pieski muittuha man dehálaš lea gávdnat sajiid main lean oadjebas leat sihke sápmelažžan, muhto maiddái arvedávgeolmmožin.

– Galhan dat lea áibbas earálágán pride dat Sápmi Pride, go mii leat doppe. Dat ii leat diekkár, ahte galgá čilget váldoservodahkii dahje vilgesolbmuide arvedávgeservodagas, ahte mo dat lea leat maiddái sápmelaš dahje eamiálbmotolmmoš dasa lassin ahte gullá arvedávgeservodahkii.

Pieski sávvá, ahte Sápmi Pride oidno ja gullo dan vahkuloahpa Ohcejogas.

– Dieđusge sávan, ahte dat bohciidahttá ságastallama ja áššit mannet ovddos guvlui.

Guldal maid Pinja Pieski muitala Sápmi prides. Jietna: Tobias Poggats / SR

Varrasamosat: Sápmi

Váldoođđasat

Varrasamosat

Muualla Yle.fi:ssä