Sápmi |

Sapmifilm.com stuorru olles áigge – Váillahit geahččiid maiddái Suoma bealde

Sapmifilm.com-rávdnjenbálvalusas leat dál sullii 40 filmma ja olles áigge figget oažžut lasi. Sámi filmmaid lassin áigot čájehit eamiálbmotfilmmaid miehtá máilmmi.

Jietna: Sunna Nousuniemi
Jietna
Sunna Nousuniemi Internašunála Sámi Filbmainstituhtas muitala, ahte sapmifilm.com-bálvalusa doaibma lea vuolgán bures johtui. Jietna: Yle Areena. Govva: Kukka Ranta

Sapmifilm.com lea rávdnjenbálvalus dahje videooastinbálvalus, gos gávdnojit sámi filmmat ja dat rahppui njukčamánu álgobealde álgoálbmogiid filbmakonferánssa oktavuođas Guovdageainnus. Bálvalusa bokte sáhttá geahččat sámi filmmaid ja dokumeanttaid, mat leat buvttaduvvon iešguđet riikkain. Bálvalusa ovddasvástideaddjin ja rávdnjeheaddjin doaibmá Internašunála Sámi Filbmainstituhta ISFI.

– Sapmifilm.com lea ođđa vuohki, mainna mii doarjut sámi filbmadahkkiid ja čalmmustahttit sámi kultuvrra filmmaid bokte ja bargat dan ovdii, vai sámi filmmat ožžot ain lasi fuomášumi Suomas, Ruoŧas ja Norggas, čilge Sunna Nousuniemi Internašunála Sámi Filbmainstituhtas.

Nousuniemi muitala, ahte doaibma lea vuolgán bures johtui. Netflix-lágán bálvalusas leat diŋgojeaddjit ja dál doppe leat sullii 40 filmma.

– Olles áigge mii figgat fitnet dohko lasi sámi filmmaid. Bálvalus stuorru olles áigge ja dasa bohtet lasi geavaheaddjit.

Dan Nousuniemi ii máhte dadjat, gallis geavaheaddjit bálvalusas leat dál.

– Muhto Suomas eai leat vel nu olu. Mii figgat oažžut maiddái Suomas eanet sámi geahččiid, muhto dieđusge maiddái eará geahččiid.

Mielde maiddái Sámi oahpahusguovddáža mediastudeanttaid filmmat

Sapmifilm.com-bálvalusas gávdnojit buotlágagan filmmat: oanehis dokumentárat, fikšuvnnat, animašuvnnat ja komediija maiddái, logahallá Sunna Nousuniemi.

– Doppe gávdno Seven sámi stories, mas leat čieža sámi oanehisfilmma ja man ISFI lea álggahan. Mii leat maiddái válljen Sámi oahpahusguovddážis mediastudeanttaid filmmaid ja hálidit daid buktit ovdan, vai datge ožžot eanet fuomášumi.

Bálvalussii hálidit buotlágan sámi filmmaid. Dehálaš lea, ahte filmmain gullo sámegiella ja ahte doppe leat buotlágan kategoriijat. Nousuniemi muitala oktan ulbmilin dan, ahte bálvalus doaibmá dego sámi filbmavuorkán.

– Dohko bohtet maiddái dakkár boares dokumentárat ja arkiivafilmmat, vai besset čalmmustahttit, man viiddis dat min kultuvra lea, ja ahte lea duođaige dakkár sadji, gos gávdnojit buotlágan filmmat, mat eai vealttekeahttá čájehuvvo TV:s dahje filbmafestiválain. Dat lea hui dehálaš, ahte livččii álo dakkár vejolašvuohta beassat geahččat sámi filmmaid.

Plánan lea maid álggahit eamiálbmogiid kategoriija, vai sáhttet čájehit eamiálbmotfilmmaid miehtá máilmmi. Dat válljejuvvojit ovttasbarggus Skábmagovat-filbmafestiválain.

– Mii áigut fitnet dohko buriid ja geasuheaddji filmmaid, vai olbmot besset návddašit eamiálbmogiid filmmain, loahpaha Sunna Nousuniemi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä