Sápmi |

Sara ja Gaup leaba dán jagáš Gollegieđat – dá oainnát geat birgejedje Márjjábeivviid njoarostangilvvuin

Heahtá Márjjábeivviin ordnejuvvui lávvardaga árbevirolaš njoarostangilvu ja sotnabeaivve fas Gollegiehta-njoarostangilvu.

Elen-Anne Sara ja Johan Ivvár Gaup
Elen-Anne Sara ja Johan Ivvár Gaup faskiiga vuoittu Márjjábeivviid Gollegiehta-njoarostangilvvus. Govva: Linnea Rasmus / Yle
Heahttá

Márjjábeivviid njoarostangilvvut čohkkejedje njoarosteaddjiid miehtá Sámi Heahtá márkanii lávvardaga ja sotnabeaivve.

Dán jagáš Gollegiehtan njoarosteigga mázelaš Johan Ivvár Gaup Válgenjárgga orohagas ja Elen-Anne Sara Sállevári bálgosis. Sara njoarostii alcces duppalvuoittu, go faskii vuosttas saji maiddái árbevirolaš njoarosteamis lávvardaga.

– Dat gal lea buorre dovdu. Lei buorre vahkuloahppa dán háve, illuda Sara.

Sállevári nissonat gilvaledje gaskaneaset – almmáiolbmuid luohkás vuoitu Norgga beaillái

Sotnabeaivve Gollegiehta-gilvui oassálaste 18 almmáiolbmo ja njeallje nissonolbmo. Gilvvus njoarostedje lihkadeaddji stoalppuide.

Elen-Anne Sara časkkii finálas oappás Magreta Sara. Goalmmádin njoarostii Anni Magga-Eira ja njealjádin bázii Marjinga Sara. Buot nissonolbmuid luohká oasseváldit gullet Sállevári bálgosii.

Gollegiehtan bálkkašuvvon Elen-Anne Sara sávašii, ahte eambbo nissonolbmot oassálasttáše gilvui.

– Livččii hui somá, go eambbo nissonat maiddái searvale. Mii leat unnivuođa rájes jo hárjánan dan gilvaleapmái, ahte das dat várra boahtá, ahte min bálgosis bohtet dat gilvvohallit, smiehtada Sara.

Elen Anne Sara Gollegiehta-suopunginheittokilpailussa Hetan Marianpäivillä 2019
Elen-Anne Sara faskii duppalvuoittu. Govva: Linnea Rasmus / Yle

Almmáiolbmuid luohkás Johan Ivvár Gaup časkkii finálas Per Anders Bongo Ordda orohagas Guovdageainnus. Goalmmát saji faskii Niko Näkkäläjärvi Neakkelis ja njeljádin šattai Jon Andreas Eira Skuohtenjárggas.

Almmáiolbmuid luohká vuoitán Johan Ivvár Gaup muitala, ahte son ii leat goassige ovdal vuoitán njoarostangilvvu.

– Dát lei nuppádassii go mun gilvalin juste dán šiljus. Ovddit háve časkkahallen semifinálas olggos, nu ahte lei hui somá vuoitit, illuda Gaup.

Johan Ivvár Gaup iloitsee suopunginheittokilpailun voitosta
Johan Ivvár Gaup illuda vuoittus. Govva: Linnea Rasmus / Yle

Dán vuoittus sus lei lihkku.

– Dalle álgovuorus, go álggii dat gahčahan, mun deiven dušše ovtta čuoggá ja ledjen sihkkar, ahte dál mun gal ravggahan olggos. Muhto dat mu olmmái, gean vuostá mun njoarostin, dat ii deaivan ovttage, nu ahte mun bessen joatkit, čilge Gaup.

Árbevirolaš njoarostangilvvu vuittiiga Näkkäläjärvi ja Sara

Lávvardaga árbevirolaš njoarostangilvui oassálaste njeallje almmáiolbmo ja njeallje nissonolbmo.

Almmáiolbmuid luohká vuittii Niko Näkkäläjärvi Neakkelis. Nuppi saji faskii Janne Näkkäläjärvi Neakkelis, goalmmádin njoarostii Marko Ranta Neakkelis ja njealjádin Mahte-Issat Eira Lákkonjárggas.

Niko Näkkäläjärvi gollegiehta-suopunginheittokilpailussa Hetan Marianpäivillä 2019
Niko Näkkäläjärvi vuittii almmáiolbmuid luohká árbevirolaš njoarosteames. Govva: Linnea Rasmus / Yle

Nissoniid árbevirolaš njoarostangilvvu falimus lei Elen-Anne Sara, nubbin njoarostii Anni Magga-Eira, goalmmádin Sunna Máret Sara-Tornensis ja njealjádin Marjinga Sara. Buohkat gullet Sállevári bálgosii.

Ollesolbmuid luohkáid golbma buoremusa ožžo ruhtabálkkašumi.

Divvojuvvon 24.3. dii 22:33: Árbevirolaš njoarostangilvvu nissonolbmuid luohká nubbi ja goalmmát sajit divvojuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä