Sápmi

Sárgosat rahpe duopmáriid čalmmiid, mo mánátge sáhttet guoddit fuola eananspáppa suodjaleamis – plákahtagilvvu bohtosat almmustahtton

Siiri Ketola
7-9-jahkásaččaid ahkeluohkás duopmáriid favorihtta lei Siiri Ketola govva Gárasavvonis. Govva: Preassagovva / Sámediggi

Duopmárgoddi oaivvilda, ahte juohke govas lei nana jurdda ja iežas oaidnu boahtteáiggis dálkkádatrievdama olis.

Sámi mánáidkulturguovddáš Mánu ordnen plakáhtagilvu Dálkkádat rievdá – Váldde beali bohtosat leat almmustahttojuvvon odne vuossárgga 30.11.

Plakáhtagilvvus mánát ja nuorat sáhtte váldit beali dálkkádatrievdamii ja muitalit iežaset jurdagiid fáttás friddja govvadáidaga vugiin. Govat sáddejuvvojedje oktiibuot 80.

Duopmárgoddi lea dál árvvoštallan govaid ja válljen vuoitiid. Duopmárat leat filbmadahkki ja -bagadalli Sunna Nousuniemi, boazodoalli Jussa Seurujärvi ja cree-álbmogii gullevaš Mandy Gull.

Duopmáriid mielde buot govain lei čielga jurdda

Sámedikki dieđáhusas plakáhtagilvvu duopmárgoddi oaivvilda, ahte juohke govas lei nana jurdda ja iežas oaidnu boahtteáiggis dálkkádatrievdama olis. Go buot govat čohkkejuvvojit oktii, dain boahtá máŋggajienalaš ollisvuohta ja duopmárat deattuhedje, ahte dehálamos lea duostat buktit ovdan iežas jiena dan dihte, go juohke jienas lea mearkkašupmi.

Duopmárgoddi oinnii maid mánáid ávaštan balu, mii oaččui rávesolbmo jurddašit, man lahka mánná lea globála rievdadusa. Mánáidkulturguovddáža dieđáhusas muitalit, ahte mánás lea riekti dorvvolaš mánnávuhtii ja oasálašvuhtii ealas birrasis dál ja boahtteáiggis.

– Dálkkádatrievdan-ságastallamiin hállojuvvo dávjá boahttevaš buolvvain, vaikko sii leat juo oasálažžan dál ja gárvásat doaibmat ja sirret birrasa iešguđet áitagiid.

Ida Moshnikoff
10-12-jahkásaččaid ahkeluohkás duopmáriid favorihtta lei Ida Moshnikoff govva. Govva: Preassagovva / Sámediggi

Vuoitit ledje Anáris, Avvilis, Gárasávvonis ja Kirkkonummis

Gudnemáinnašeami aktiivvalašvuođas oaččuiba 6-jahkásaččat Kaneli Nieminen ja Jooa Buska Čeavetjávrris. Duopmáriid mielde sárgosat rahpe sin čalmmiid, mo 6-jahkásaččatge sáhttet guoddit fuola eananspáppa suodjaleamis.

7-9-jahkásaččaid ahkeluohkás duopmáriid favorihtta lei Siiri Ketola Gárasavvonis. Duopmáriid miede govas dáhpáhuvvá olu ja dat lei čielgasit ollašuhttojuvvon. Dahkki lihkostuvvá gaskkustit dálkkádatrievdama dagahan kaotihkalaš dovddu geahččái. Gudnemáinnašumiid oaččuiga Elle Kumpunen Avvilis ja Ánná-Frida Vars Vuohčus.

10-12-jahkásaččaid ahkeluohkás duopmáriid favorihtta lei Ida Moshnikoff Kirkkonummis. Duopmáriid kommentáras sii dadjet, ahte dahkki lea ráhkadan dovdduide čuohcci čuorvvassáni ja iešguđet dáiddateknihkaid geavahemiin ožžon áigái váikkuheaddji plakáhta. Buohkat orrot diehtimin, muhto oktage ii daga maidige, čuožžu plakáhtas. Gudnemáinnašumi oaččui Biret-Ingermaria Vars Vuohčus.

13-15-jahkásaččaid ahkeluohkás duopmáriid favorihtta lei Kaisla Suominen Anáris. Duopmáriid mielde son konkretiserii plakáhtain dan, ahte dálkkádatrievdan-ságastallamiin ollu hállojuvvon "boahttevaš buolvvat" leat juo dáppe ja fuolas iežaset boahtteáiggis. Gudnemáinnašumi oaččui Emma Saari Anáris.

Kaisla Suominen
13-15-jahkásaččaid ahkeluohkás duopmáriid favorihtta lei Kaisla Suominen govva Anáris. Govva: Preassagovva / Sámediggi

Varrasamosat

Muualla Yle.fi:ssä