Sápmi

Searvegottiid neahttabuktagat leamaš bivnnuhat ja ságastallanveahkkái orru leamen dárbu

matti hirvilammi
Eanodaga girkohearrá Matti Hirvilammi lohká, ahte sin ipmilbálvalusaide leat gávdnon olu geahččit neahtas. Govva: Eanodaga searvegoddi / Enontekiön seurakunta

Eanodaga girkohearrá oaidná, ahte kriisa áigge girku rolla lea stuoris.

Sáhttá gal lohkat, ahte girku lea lihkostuvvan olbmuid olaheamis neahta bokte. Go girkut leat gitta, leat ođđalágán čovdosat geavahusas. Neahta bokte beassá oaidnit ja guldalit nu ipmilbálvalusaid go earáge vuoiŋŋalaš sisdoaluid.

Ovdamearkka dihte Anára searvegotti guokte maŋimuš ipmilbálvalusa leat geahččan Facebookas dán rádjái oktiibuot goasii 1 600 geardde. Logu sáhttáge vaikkoba buohtastahttit dasa, ahte Anára searvegoddái gullet oktiibuot 4 447 olbmo.

Eanodaga searvegoddiges sádde neahta bokte ipmilbálvalusaid. Sii barget maid ovttasbarggu Muoná searvegottiin nu, ahte sáddejit juohke vahku rohkosa Luppokotii Heahttái ja Muoná boarrásiidsiiddaide suomagillii. Searvegottis muitalitge, ahte vaikko girkui ii sáhte boahtit oasálastit ipmilbálvalussii, lea sin YouTube-sáddagis leamaš olu eanet geahččit, go girkus livčče dábálaččat olbmot.

Ohcejoga searvegoddi sádde maiddái ipmilbálvalusaidis Facebook-njuolggosáttan. Searvegotti Facebook-siidduin almmustuvvet maid rohkosat juohke beaivve, mas ovdamearkkan otná, maŋŋebáriđida rohkos, man leat geahččan juo badjel 400 geardde.

Uppslagen bibel och ett tänt ljus vid en radio.

"Olbmot áibbašit guldaleaddji"

– Oainnán, ahte searvegottiin lea stuorra rolla dákkár kriisa áigge, lohká Eanodaga girkohearrá Matti Hirvilammi.

Son muitala, ahte olbmot leat juoga veardde váldán sidjiide oktavuođa neahta bokte. Searvegotti bargit leat maid olbmuiguin oktavuođas ja gergosat háleštit singuin.

– Lea maid vejolaš jearrat iežas ruoktot doallat priváhttaeahkedaččaid ja dás mii leatge bastán bálvalit, Hirvilammi muitala.

Anára girkohearrá Tuomo Huusko mielde oktavuođaváldimat leamašan eanet, go dábálaš árgan. Máilmmedilli fuolastuhttá juohkehačča ja máŋgasat vásihit oktonasvuođa. Leage lunddolaš, ahte girkus gávdno háleštallanguoibmi.

– Olbmot háliidit guldaleaddji, sii áibbašit guldaleaddji ja muitalit, ahte sis lea fuolla dán spiehkastatdilis, lohká Huusko.

Oaivvis jorret jurdagat das, makkár dilis máilbmi lea ja makkár eallindilli alddis lea. Jurdagiin leat maid eallilan olbmot, go máŋgasat sis soitet okto ruovttus, iige oktavuođa leatge nu álki šat doallat. Dáid váivves jurdagiid sáhttá juohkit vaikkoba girku bargiiguin.

– Mun roahkasmahtán riŋget ja váldit oktavuođa, Huusko dadjá.

Varrasamosat

Muualla Yle.fi:ssä