Sápmi |

Servodat rahpasišgođii otná rájes: Anáris fitnodatdoalli vuordá jo áššehasaid ja álšasáliide beassá fas trenet

Restoráŋŋat, museat, teáhterat, girjerádjosat ja vuojadanhállat rahpasedje fas otne vuossárgga.

Raimo Waselus
Fitnodatdoalli Raimo Waselius lea fuolas das, mo koronadilli váikkuha geasi sesoŋŋaáigái. Govva: Kirsti Länsman / Yle

Anárlaš bensenstašuvnnas lea buot gárvvisin áššehasaide: dieđáhusat koronas leat heŋgejuvvon seinniide ja desinfierenbáiki lea biddjon uksagurrii.

Fitnodatdoalli Raimo Waselius lea eamidiinnis ráhkkanan rahpat iežaska báikki dál, go koronavirusráddjehusaid burgin joatkašuvvá Suomas ja restoráŋŋat rahpet vuossárgga rájes fas uvssaid dihto eavttuiguin.

– Áibbas buorre dovdu go viimmat beassat fas 2,5 mánotbaji maŋŋá rahpat. Dás dat vuolgá fas, illuda Waselius.

Ruđalaš dilis son lea vehá fuolas, go geassi leamaš su fitnodahkii dat buoremus sesoŋŋaáigi. Eandalii norgalaččaid váilun boahtá váikkuhit dietnasii.

– Galhan dat vuordimis lea, ahte beliin njiedjá dienas jus ii eanetge, go olgoriikalaš turisttat váilot. Ii leat vel diehtu, mo norgalaččat besset johtit dán gease, árvala Waselius.

Dál goittot ráhkkana váldit vuostá fas áššehasaid, rabasta iđđes olgouvssa ja čákŋala diskka duohkái.

– Buot lea gárvvisin, eamit lea ordnemin lunšša. Ammal jo bohtet fas olbmot deike, muitala Raimo Waselius iđđes gávcci áigge doaimmaheaddjái.

Geassemánu álggu rájes restoráŋŋaid kundarbáikkiid oažžu deavdit eanemustá beliin, alkohola vuovdima ferte heaitit diibmu 22 ja uvssaid ferte giddet maŋimustá diibmu 23.

Álšasálet rahpasit Sámis

Maiddái museat, teáhterat, girjerádjosat ja vuojadanhállat rahpasit otne vuossárgga.

Oassi álšasáliin lea leamaš rabas koronaáiggege, muhto ovdamearkka dihte Ohcejoga ja Anára gielddain álšasálet leat rahpasan odne. Ohcejoga gieldda rávvagiid ja álšasáliid rabasáiggiid gávnnat dáppe.

Anára gieldda astoáiggečálli Mervi Urpilainen muitala rávan dorvvolaš álšasálehárjehallamii hygienas fuolaheami ja dan, ahte buohccin ii galgga vuolgit hárjehallat. Eará rávvagiid ja rabasáiggiid gávnnat dáppe.

Urpilainen muitala ahte Anára gielddas ii leat fásta gohcci sáliin, muhto sii luhttet dasa ahte sáliid geavaheaddjit doibmet rávvagiid mielde. Gielddas čuvvot dili ja almmuhit ođđa rávvagiin, go dilli rievdá.

– Viggat dasa, ahte eai boađášii njoammumat ja hárjehallan livččii dorvvolaš. Dát leat váldegottálaš rávvagat, dadjá Urpilainen.

Oulus ássi Inka-Saana Vieltojärvi trenemii koronaráddjehusat ja daid burgin eai olus leat váikkuhan, go son lea beassan fitnat sáles áibbas dábálaččat.

– Dáppehan Oulus leat measta buot lášmmohallansálet rabas, mun lean fitnan doppe trenemin 4–5 háve vahkus, muitala Vieltojärvi.

Son lea koronas fuolakeahttá fitnan lášmmohallamin álšasáles, go trenen lea sutnje dehálaš. Son lea maiddái háliidan doarjut álšasále, vai dat ii mana ollásit gitta. Vieltojärvi muitala, ahte son fuolaha bures hygienas ja geahččá, ahte eai leat gáfat olu olbmot trenemin seammá áigge.

– Várra juoga vihtta olbmo leat leamaš trenemin seammá áigge, jos dange. In ieš bala, go fuolahan hygienas bures, basan gieđaid, desinfiseren ja doalan gistáid. Doppe leat maiddái dakkár desinfiserenbáhpárat mainna sáhttá sihkut mašiinnaid, son muitala.

Varrasamosat: Sápmi

Váldoođđasat

Varrasamosat

Muualla Yle.fi:ssä