Sápmi |

Sihkkelasti báhčán loddebivdái duopmu roavva jápmimadagaheamis ja meahcástanrihkkosis

Almmái bážii sihkkelasti jámas Urho Kekkonena álbmotmeahcis golggotmánus.

Lapin käräjäoikeustalo edestäpäin kuvattuna.
Duopmu lea addon Lappi gearretrievttis. Govva: Mia Sivula / Yle

Lappi gearretriekti lea dubmen loddebivdi jagi ja njealji mánotbaji guhkkosaš evttolaš fáŋgavuođaráŋggáštussii roavva jápmimadagaheamis ja meahcástanrihkkosis. Áššis muitalii vuosttamužžan Helsingin Sanomat.

Báhčči dubmejuvvui maiddái máksit báhččon sihkkelasti váhnemiidda buhtadusa gillámušas oktiibuot 12 000 euro. Buhtadussupmi lea sullii 43 000 euro, go dasa rehkenastá maiddái dienasmassimiin, riektegeavvangoluin ja hávdádangoluin máksojuvvon buhtadusaid.

Almmái bážii sihkkelasti jámas Urho Kekkonena álbmotmeahcis mannan golggotmánus.

Alaguoddi gáibidii albmái badjel guovtti jagi eavttuhis fáŋgavuođa. Almmái šiittii, ahte livččii doaibman iešdáhtolaččat dahje roavvásit fuollameahttumit. Almmái ieš oaivvilda, ahte dáhpáhus lei vahát. Son šiittii áššáskuhttima roavva jápmimadagaheamis, muhto mieđihii iežas sivalažžan jápmimadagaheapmái ja meahcástanrihkkosii.

30-jahkásaš almmái lei sihkkelastimin merkejuvvon meahccebálgáid, go jagis 1954 riegádan loddebivdi bážii ja ládda deaivvai sutnje. Sihkkelasti lei eret oaivegávpotguovllus, ja son lei jođus njeljiin eará olbmuin. Sii geahččaledje addit vuosttasveahki, muhto almmái jámii ovdalgo vuosttasveahkkedivššárat ollejedje báikki ala.

Meahciráđđehus lea dáhpáhusa maŋŋá mearridan evttohit meahcástangildosa daid álbmotmeahcceguovllu, gos lávejit johtit eanemus vánddardeaddjit.

Dá gulat ođđasamos Yle Ođđasiid Sámis. Jietna: Yle

Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä