Sápmi |

Sii eai beroš pop-musihkas baicca árbevirolaš luođis

Dábálaččat nuorat beroštit pop- dahje rock-musihkas, muhto Oarjánnieiddat eai, sin miela mielde leat árbevirolaš luođit. Sis ledje guokte ovdanbuktima Skábmagovain ja dan maŋŋá šealgugođii oktasaš niehku vel stuorát lávddiin.

Oarjánnieiddat juige Skábmagovaid nuoraid beaivvis jagis 2018.
Oarjánnieiddat juige Skábmagovaid nuoraid beaivvis jagis 2018. Govva: Ville-Riiko Fofonoff / Yle

Golbma nieiddaža, eret Eanodagas, eai hálit leat makkárge oarjemáilmmi Selena Gomez –kopiijat, baicce juoidá hui sápmái.

– Mii leat Oarjánnieiddat ja mii juoigat ovttas árbevirolaš luđiid, muitala Inger-Anni Valkeapää.

Go deiven Oarjánnieiddaid vuosttas háve, sii ledje hárjehallamin áŋgirit, ledjehan sis ovddabealde ovdanbuktimat Skábmagovaid nuoraidbeaivvis ja vel eahketdoaluin hoteallas.

Anna Näkkäläjärvi-Länsman bagadallá Oarjánnieiddaid.
Anna Näkkäläjärvi-Länsman bagadallá Oarjánnieiddaid. Govva: Ville-Riiko Fofonoff / Yle Sápmi

Earenomáš, ahte háliidit juoigat

Sin dálá bagadalli Anna Näkkäläjärvi-Länsman rámidii joavkkus seammás go čájeha mo artista galgá doallat gieđaid , moddját ja fáŋget olbmuid beroštumi.

– Nieiddat leat beroštuvvan namalassii árbevirolaš luođis ja dan ealáskahttimis. Sii háliidit oahppat namalassii daid sin sogaid boares luđiid.

– Dat lea viehka earenomáš dán áigge, ahte dat háliidit namalassii daid oahppat eaige ovdamearkka dihte pop-musihkka dahje rock-musihka, čilge Näkkäläjärvi-Länsman.

Vaikko nuora leatge, de eai rohtte vuosttas geardde luođi

Oarjánnieiddat joavku lea leamašan čoahkis moadde jagi. Sin leat bagadallan nu beakkán juoiganartista Vilgon Máreha Anna-Reetta, Anna-Reetta Niemelä ja vaikkoba Biret Ristin Sara.

Maren-Elle Mäkitalo, Oarjánnieiddat
Jávrrešduottar-luohti muitala mu máttuin, muitala Maren-Elle Mäkitalo. Govva: Ville-Riiko Fofonoff / Yle Sápmi

Oarjánnieiddat leat oahpahallan árbevirolaš oarjánsámiid luđiid. Go vuorus lea Jávrrešduoddara-luohti, de Maren-Elle Mäkitalo muitala, ahte dat lea suinne dehálaš luohti.

– Dat muitala mu muitala mu máttuin, dan áigge fulkkiid guohtoneatnamiin.

Máret-Elle Valkeapää, Oarjánnieiddat
Šaddá somás ja diekkár energiijalaš dovdu go juoigá, dadjá Máret-Elle. Govva: Ville-Riiko Fofonoff / Yle Sápmi

Joavkku nuoramusa, 12-jahkásaš Máret-Elle Valkeapää dego ealáskivčče vel eanet go rohttesta luođi. Go bivddán govvidit dovddu mii suinne juoiggadettiin šaddá, vástádus ii ádján.

– Hui somás ja diekkár energiijalaš dovdu, govvida Máret-Elle Valkeapää.

Vielladit vel stuorát lávddiide

Go guđđe Skábmagovaid nuoraid beaivvi –lávddi, de eai eisige lean báltun juoigamis. Oktasaš niehku šealggehii ja juohkehaš háliida dan seammá.

– De eará konsearttaide ja festiválaide vaikko ja diekkáriidda, doapmala Inger-Anni dadjat.

Inger-Anni Valkeapää, Oarjánnieiddat
De festiválaide, jurdilii Inger-Anni konseartta maŋŋá. Govva: Ville-Riiko Fofonoff / Yle Sápmi

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä