Sápmi |

Sii vurdet gealdagasas čivggaid – Eevi Korva vuoncát leat Anára márkana beakkálmasat

Eevi Korva bearrašis leat dál gealdagas bessema lihkostuvvamis ja ožžotgo dán geasi vel čivggaid.

Eevi Korva ja vuoncát.
Anára márkana čeavlás gánda Kyösti. Leathan sus golbma moarsi. Eevi Korva vuoncát návddašit geassebeaivvis. Govva: Kirsti Länsman / Yle

Davvin olbmot leat movttiidan doallat vuoncáid. Anárlaš Eevi Korva movttiidii vuoncáin badjelaš jahki dassái. Vuos son ozai dain buotlágan dieđuid duoppil dáppil. Son háliidii diehtit, mo dáid elliid galgá dikšut ja maid daid dikšun iešalddes gáibida.

Dábálaš suopmelaš vuonccis lea viehka álkes divššohas. Gohan lea visti, mii jeahká vejolaš vašálaččaid ja doallá váhá lieggasa, dat reahkká dálvit. Geassit fas birgejit olgun ja beaivvit golletge šiljus.

– Duot visti lea dakkár, ahte bissu nolla gráđa bajábealde, ahte čáhci ii galbmo dahje jieŋo. Eará dat ii oalle láhkai gáibit, ja dasto daid iežas nisttiid: hávvariid, vuoncáfuođđariid ja borramušbázahusaid, Eevi Korva muitala.

Borramuššan dohkkege measta mii beare. Vuoncát maid ieža gávdnet šiljus váikke maid, ovdamearkan divrrit dohkkejit. Iige leat dakkár borramušbázahus, mii ii daidda vel dohkke ja jávkka njunne ráigge. Vuonccis ii leatge birgema dáfus ránttos ealli.

Lobis čivggat?

Lotta-vuonccis.
Lotta-nammasaš vuoncás leat olles 13 mani lállinláhkái. Govva: Kirsti Länsman / Yle

Olles Korva bearaš Anára márkanis lea dál gealdagasas moson bessen lihkostuvvá. Ovttas nieiddainis son lea huksen vuoncáid dállui beasi, ja dál okta vuonccis lea aiddo lállimin.

Vuonccis lea maid viehka rehketalmmái, ja dat diehtá, ahte ovtta mani dihte ii gánnet vel livvut.

Lotta-nammasaš vuoncás leatge dál lállinláhkái buohkanassii 13 mani, ja sullii guovtte-golmma vahku geažis čielgá, ožžotgo sii daid vurdojuvvon čivggaid. Aŋkke čorraga varris lea dikšon iežas oasi, nu ahte dan bealis čivgan galggašii lihkostuvvat.

Korva čorragii gullet Kyösti-nammasaš varris, duos máinnašuvvon Lotta ja vel guokte eará njiŋŋálasa Neiti X ja Hertta. Vuoncát leat dál jagi boarrásat, ja mannejit sullii moatte jahkásažžan. Go heitet mannemis, giiba diehtá, ahte leago čuovvovaš čujuhus ruitu.

Kyösti gohkke čorragis

Kyösti-nammasaš varris.
Kyösti gohkke oalle viššalit iežas čorraga. Govva: Kirsti Länsman / Yle

Dásseárvu ii leat vel ollen vuoncáid máilbmái ja nuba varris gohkke ollesáiggi joavkkus. Dat ohcá borramuša ja gohčču nuppiid boradit ja fáruha vejolaš áitagiin. Eevi Korva muitala, ahte das leat máŋggat sierralágan jienat, maid dat geavaha.

Varris ii ollesáigge biškku dan beaggán suomagielat dajaldaga mielde "kukkokiekuu", dan jiena dat geavaha iđedis ja dallego lea almmáštallamin.

Korva goit fertii gulahallat ránnjáiguin ovdalgo duosttai váldit vuoncáid, dathan sáhttet leat maid oalle jidnes diŋggat.

Kyösti-varris muitá goit árraiđit biškkustit dan kukkokiekuu, go háliida rávkat dáluveaga. Muđui olgun guođodettiin dat jietnadaddá jaskat “kot kot kot”, mainna addá mearrádusaid iežas morsiide.

Das leat maid čielga várohusjienat, juos ovdamearkan stuorra lottit bohtet girddašit sin šilju bajábeallai.

Anára márkana beakkálmasat

Golbma vuoncá.
Dát vuoncát leat Anára márkana beakkálmasat. Govva: Kirsti Länsman / Yle

Maid davvin olbmot leat movttiidan váldit vuoncáid alcces ja maid Anára guovllus dat beakkehit máŋgga dálus. Vuonccis lea oalle persovnnalaš ealli, iige lahkage nu gáigá, maid fáhkka sáhtášii gáddit.

Vuoncát eai goittot leat nu dábálaččat davvin, ja danin máŋggas háliidit boahtit geahččat Eevi vuoncáid. Kyösti goit lea nu čiega gánda, ahte son duostá luoitit olbmuid geahččat dan.

Muhtumin varris sáhttá leat oalle bahá ja dan njuni ja gaccaid ferte fáruhit.

– Justa dálge jearai duot beaiveruovttujoavku, ahte juos sii beasašedje fitnat oahpásmuvvamin dáidda min vuoncáide. Galhan dat olbmot háliidit ja maiddái gili olbmotge lávejit jearadit, ahte goas beassá fitnat guovlaleamen.

– Ránnját maid lohket, ahte dat lea nu somá go dat vuoncávarris álo gullo dáppe iđđes rávkamin olbmuid, vuonccesdálolaš Eevi Korva Anáris vel muitala.

Varrasamosat: Sápmi

Váldoođđasat

Varrasamosat

Muualla Yle.fi:ssä