Sápmi |

Siidda Ealli biras -čájáhus čálmmustahttá sámi kulturbirrasa

Ealli biras -čájáhus lea muitalus das, man máŋggaláganat Suoma sámeguovllu duovdagat ja kulturbirrasat leat. Čájáhusas leat arkeologalaš dávvirat, huksenárbi ja erenoamaš muitaluslávvu, mas sáhttá guldalit máidnasiid miehtá Sámi.

Anáraškultuvrra áššedovdi Vuoli Ilmar ja Äijih.
Anáraškultuvrra áššedovdi Vuoli Ilmar ja Äijih. Govva: Sámemusea Siida

Siidda ođđa čájáhus Ealli biras, mii rahppojuvvo bearjadaga, čalmmustahttá sámi kulturbirrasa. Ealli biras -čájáhus lea muitalus das, man máŋggaláganat Suoma sámeguovllu duovdagat ja kulturbirrasat leat.

Sámeguovlu lea viiddis ja luondu rievdá olu guovllus nubbái. Sierralágan guovlluin leatge iešguđetlágan eanageavahan-, ealáhus- ja ássanhámit.

Ođđa arkeologalaš gávdnosat oaidninláhkai vuosttas háve

Dáid maŋimuš jagiid arkeologalaš gávdnosat leat buktán ođđa dieđuid sámeguovllu ásaiduhttima muttuin. Čájáhusas leat oaidniláhkai olu arkeologalaš dávvirat.

- Moaddelot jagi dás ovdal Anára Oađđiveajis gávdnojedje valjis dálvesiidda goahtevuođut, mat dutkojuvvojedje arkeologalaš roggamiin. Earret eará dát ja máŋggat eará dávvirat leat dál vuosttas háve oaidninláhkai sámeguovllus, Siiddas dieđihuvvo.

Muitaluslávus muitalusat miehtá Sámi

Duovdagiidda laktásit ollu sierralágan árbedieđut, mat sirdašuvvet buolvvas nubbái oktasaš dahkama bokte ja muitaluvvon muitodiehtun.

Ealli biras -čájáhusa erenoamašvuohta lea muitaluslávvu, mas sáhttá guldalit báikkiide guoskevaš muitalusaid miehtá Sámi. Čájáhusa duogážis čuoddji jietnaduovdaga lea duddjon musihkkár Wimme Saari.

Čájáhus gullá oassin Sámemusea Siidda seammanammasaš fidnui, mii nohká čakčamánus. Das buvttaduvvo sámi kulturbirasprográmma -publikašuvdna, masa dát čájáhus laktása. Fidnu ruhtaduvvo EAKR - Eurohpá guovlluidovddidanfoanddas ja dan riikkadási ruhtadeaddjin doaibmá Lappi Lihttu.

Siidda Ealli biras -čájáhus lea álbmogii rabas 15.6.2013-25.5.2014. Loga lasi Siidda neahttasiidduin ja geahča lasi čájáhusa govaid Siidda govvabáŋkkus.

Varrasamosat: Sápmi

Váldoođđasat

Varrasamosat

Muualla Yle.fi:ssä