Sápmi |

Siidda museagávppis háliidit vuovdit eanet báikkalaš gálvvuid – ohcet dál sápmelaš ovttasbargoguimmiid

Museagávppis sávvet doaibmiin gálvvuid, main sámevuohta oidnošii eanet.

Satu Airola, Saamelaismuseo Siida
Museagávppi vástideaddji Satu Airola sávvá váldit oktavuođa, jus háliida buktagiiddis ođasmuvvan museagávpái giđđat 2022. Govva: Vesa Toppari / Yle

Dál go olles Sámemusea ja luondduguovddáš Siidda leat ođasmahttimin, boahtá maiddái museagávpi Siida Shop ođasmuvvat – jo dán jagi bealde. Boahtte geasi rájes museagávpi maid rahpá neahttagávppi.

Gávpi fárre miessemánu áigge gaskaboddosaš doaibmalanjaide Siidda šilljui dan boddii, go váldoráhkkanusa divodit. Giđđat 2022 museagávpi máhccá ruovttoluotta ođasmuvvan sajiide. Seammás áigot ođasmahttit buktagiid fálaldaga.

– Mii háliidit fállat jearaldaga vuođul eanet buktagiid, maid maiddái sápmelaččat leat leamašan mielde plánemin, dadjá Sámemusea ja luondduguovddáš Siidda museagávpevástideaddji Satu Airola.

Dál sii ohcet ovttasbargoguimmiid. Airola muitalage, ahte sii vurdet báikkálaš sápmelaš doaibmiin oktavuođaváldimiid.

Museagávppis sávvet doaibmiin gálvvuid, main sámevuohta oidnošii eanet. Ulbmil lea plánet ja skáhppot gávppi fálaldaga ovttas doaibmiiguin vástidit golaheaddjiid dárbbuide.

Sávvet mielde sihke ođđa ja oahpes namaid

Ovttasbargoguoibmin sáhttá ohcat gii beare, geas lea beroštupmi fállat buktagiid vuovdimassii. Mielde sávvet sihke ođđa namaid ja oahpes doaibmiid.

– Ii dárbbaš leat suorggi ámmátolmmoš, muittuha Airola.

Otná beaivve golaheaddjit ja áššehasat leat Airola vásáhusa mielde diđolaččat. Museagávppis siktejit dasa, ahte sis leat eanet ah´ eanet fállat báikkálaš gálvvut.

– Mis jerret beaivválaččat, leago buktaga duohken sápmelaš dahkki ja mii muitalit rahpasit, mii lea dilli.

Lea maiddái lunddolaš, ahte sámemusea museagávppis leat vuovdimassii sápmelaččaid buvttadan gálvvut.

– Midjiide dehálaš lea maiddái dat, ahte gálvu lea buvttaduvvon ruovtturiikkas ja dan ráhkadettiin leat čuvvon sihke ehtalašvuođa ja ekologalaš čovdosiid buvttadeami proseassa áigge, čilge Airola.

Lassedieđuid ja oktavuođadieđuid gávnnat Siidda neahttasiidduin.

Sámemusea ja luondduguovddáš Siiddas leat dál stuorra ođastusbarggut jođus, go Siidda viiddidit ja divvot. Ođđa musearáhkkanusa vurdet gárvánit giđđii 2022. Seammás rahpasa ođđa váldočájáhus. Dan ovdal dáláš Siida Shop -museagávpi doaibmá cuoŋománu rádjai otná sajiin.

Varrasamosat: Sápmi

Váldoođđasat

Varrasamosat

Muualla Yle.fi:ssä