Sápmi |

Siidda ođđa čoakkáldatovttadaga ja restoráŋŋa huksegohtet boahtte giđa – viiddiduvvon musea ja luondduguovddáš galggašii rahpasit giđđat 2022

Sáhka lea 17 miljon euro prošeavttas.

Saamelaismusea Siidan museonjohtaja Sari Valkonen
Museahoavda Sari Valkonen illuda, go viiddidanprošeakta lea viimmat šaddamin duohtan. Govva: Linnea Rasmus / Yle
Anár

Gáržžes vuorkkáin leat dievva kássat. Iešguđetlágan diŋggat gávdnojit maid čoakkáldatovttadaga váccáhagas. Jagiid áigge Siidda vuorkkát leat dievvan iige bargiidege leat šat nohkka sadji.

Sámemusea ja Davvi-Sámi luondduguovddáš Siida lea doaibman badjelaš 20 jagi. Maŋimuš áiggiid galledeaddjimearit leat lassásan sakka. Feaskkir dievihage oatnelanbottas, go turistajoavku lávkesta sisa.

Siidda gávnnahedje menddo gáržin jo dalle, go dat rahpasii jagi 1998. Guhtta jagi maŋŋelabbos viiddideames šattai sáhka vuosttas háve. Dalle ii goittotge lean vel rivttes áigi. Vuos galggai vuordit, ahte márkanii šaddá ođđa sámekulturguovddáš.

Saamelaismuseo Siidan kokoelmavarastot ovat täynnä
Sámemusea čoakkáldatvuorkkát leat spagga dievva. Govva: Linnea Rasmus / Yle

Diibmá de Siidii ollii illuođas, go oahpahus- ja kulturministeriija várrii mearreruđaid musea viiddideami ja láigogoluid várás.

Viiddidanprošeakta boahtá máksit sullii 17 miljon euro. Seammás áigot ođasmahttit Siidda vuođđočájáhusaid. Dan ruhtadeapmi ii leat goittotge vel čielggas.

Viiddidanbarggut álget boahtte giđa – visti gurrejuvvo čuovvovaš jagi

Sámemusea ja Davvi-Sámi luondduguovddáš Siidda viiddidanbarggut álget giđđadálvve 2020. Dalle Siidii huksejuvvo sullii duhát njealjehasmehtera čoakkáldatovttadat ja badjel 300 njealjehasmehtera restoráŋŋa. Dál Siida-visti lea 2 600 njealjehasmehtera.

Restoráŋŋaovttadat huksejuvvo dálá vistti sisamannanbáikki lahkosiidda. Ođđa čoakkáldatovttadat fas šaddá vistti nuppe geahčái nu, ahte visti jotkojuvvo váldogeainnu guvlui.

– Mii fidnet áibbas ođđa albma čoakkáldatlanjaid, doarvái vuorkásaji, konserverensaji ja bargolanjaid, illuda museahoavda Sari Valkonen.

Saamelaismuseo ja Ylä-Lapin luontokeskus Siidan sisäänkäynti
Restoráŋŋaovttadat huksejuvvo seamma guvlui go áidi, mii oidno gova olgeš rávddas. Govva: Linnea Rasmus / Yle

Sámemuseas lea stuorra dárbu áššáigullevaš čoakkáldatovttadahkii vai dat sáhttá váldit vuostá Suoma álbmotmusea sámečoakkáldaga. Álbmotmusea vuolláičálii Sámemuseain 5.4.2017 ovdasoahpamuša, mainna dat lohpidii luohpadit Siidii 2 600 sámedávvira. Čoakkáldat sisttisdoallá Suoma boarrásamos sámedávviriid.

– Dieđusge dárbbašat stuorát lanjaid maiddái boahtteáiggi dárbbuid várás. Oažžut goittotge 200–300 ođđa dávvira jagis.

Viiddideami lassin dálá vistti divodišgohtet earret eará nu, ahte gáržžes feaskárii ráhkadit lasi saji. Buot čájáhusat sirdásit badjegeardái ja bargiide maid huksejit lasi bargolanjaid sihke loktii ja vuollegeardái.

Dálá vistti divodeami ja vuođđočájáhusaid ođasmahttima álggahit giđđat 2021. Dalle Siidda doaibma sirdása gaskaboddosaš sajiide ja guossit stivrejuvvojit olgomuseai.

Saamelaismuseo Siidan ulkomuseo.
Dasto go Siida-visti gurrejuvvo, olgomusea lea rabas birra jagi. Govva: Linnea Rasmus / Yle

– Boahtte jagi dohko huksejuvvojit dakkár struktuvrrat, ahte sáhttit doallat olgomusea rabas makkár beare dálkkis birra jagi, muitala Valkonen.

Ođasmahttojuvvon ja viiddiduvvon musea lea ulbmil rahpat giđđat 2022.

Varrasamosat: Sápmi

Váldoođđasat

Varrasamosat

Muualla Yle.fi:ssä