Sápmi |

Siidda ođđa vuođđočájáhussii ođđa giehtačálus – Vuosttas geahčastat eamiálbmogiid kulturárbbi semináras Anáris borgemánus

Čájáhusa giehtačálli guovttos, sámekultuvrra professor Veli-Pekka Lehtola ja suodjalanbiologa Matti Mela, muitaleaba giehtačállosa ja oppalohkái čállinproseassa birra.

Sámimusea Siidda váldočájáhus.
Sámimusea Siidda váldočájáhus. Govva: Inger-Elle Suoninen / Yle Sápmi

Anáris suokkardallet borgemánus sápmelaččaid ja eará eamiálbmogiid oainnuid musea, museageavadiid ja kulturárbbi suodjaleami dáfus. Suoma Akademiija njunušfidnu Kultuvrralaččat ja sosiálalaččat bistevaš musea loahpahanseminára "Áigi lea buoremus oahpaheaddji" lágiduvvo Anáris, Sámemusea Siiddas 28.8.–29.8.2018.

– Áigi lea buoremus oahpaheaddji -seminára gelddoleamos oassi lea Siidda ođđa vuođđočájáhusa giehtačállosa ovdanbuktin, buktá ovdan Sámemusea Siidda amanueansa Áile Aikio.

Veli-Pekka Lehtola
Sámekultuvrra professor Veli-Pekka Lehtola ja suodjalanbiologa Matti Mela leaba čállimen Sámemusea Siidda vuođđočájáhusa giehtačállosa. Govva: Linda Tammela / Yle

Aikio mielde čájáhusa giehtačálli guovttos, sámekultuvrra professor Veli-Pekka Lehtola ja suodjalanbiologa Matti Mela, muitaleaba giehtačállosa ja oppalohkái čállinproseassa birra. Giehtačállosa ovdanbuktima maŋŋá buohkain lea vejolašvuohta jearrat ja kommenteret čájáhusgiehtačállosa.

– Dán ulbmilin lea čuvget čájáhusproseassa gussiide ja fállat servošii vejolašvuođa oassálastit čájáhusa ollašuhttimii. Siidda vuođđočájáhusa ođasmahttin lea oassi Siidda viiddidanfidnus. Ollásit ođasmahttojuvvon vuođđočájáhus rahppojuvvo viiddiduvvon Siidii jagis 2022.

Buohkain vejolašvuohta oassálastit ságastallamii kulturárbbis, dan hálddašeamis ja boahtteáiggis

Áigi lea buoremus oahpaheaddji -seminára lea joatkka Sámemusea Siidda jagis 2017 ordnejuvvon seminárii Indigeneity in the Museum ja lávga ovttasbargui ovttas eará sámemuseaiguin. Dán jagáš seminára čohkke sámemuseaid ámmátolbmuid lassin maid eará kulturárbbi áššedovdiid.

Ámmátolbmuid lassin semináras maid dábálaš sápmelaččat besset jitnii. Panelaságastallan ja rabas seminára hápmi addet sápmelaččaide vejolašvuođa oassálastit ságastallamii iežaset kulturárbbis, dan hálddašeamis ja boahtteáiggis.

Seminára lea sihke ságastallanlávdi sápmelaš áššedovdiide, geat barget kulturárbbiin ja maiddái vejolašvuohta oahpásmahttit riikkaidgaskasaš gussiid Sápmái, sápmelašvuhtii ja sápmelaš kulturárbái.

Saamelaismuseo Siida
Ollásit ođasmahttojuvvon vuođđočájáhus rahppojuvvo viiddiduvvon Siidii 2022. Govva: Vesa Toppari / Yle

Kultuvrralaččat ja sosiálalaččat bistevaš musea – Eamiálbmoga ovdanbuktinvuogit ja sámekultuvra Sámemusea Siiddas (2016–2018) fidnu lea ruhtadan Suoma Akademiija ja dat lea Lappi universitehta ja Sámemusea Siidda oktasaš njunušfidnu.

Dan mihttomearrin lea hukset ja ovddidit sápmelaš museageavadagaid ja lassin ráhkadit Sámemusea Siidii ođđa čájáhusgiehtačállosa Siidda vuođđočájáhusaide ovttas Meahciráđđehusa Davvi-Lappi luondduguovddážiin.

Seminára lágideaddjit leat Sámemusea Siida, Lappi Universitehta ja Oulu universitehta Giellagas-instituhtta ovttasbarggus ON:id eamiálbmotvuoigatvuođaid EMRIP- sierramekanismmain.

Varrasamosat: Sápmi

Váldoođđasat

Varrasamosat

Muualla Yle.fi:ssä