Sápmi |

Siidda vuođđočájáhusa ođasmahttimis váilu ain badjel miljon euro – ministeriija ii doarjjo ruđalaččat

Sámemusea Siidda ođđa vuođđočájáhus boahtá máksit oktiibuot 2,5 miljovnna euro.

Saamelaismusea Siidan museonjohtaja Sari Valkonen
Museahoavda Sari Valkonen jáhkká ruhtadeaddjiid vel movttáskit ruhtadit ođđa čájáhusa. Govva: Linnea Rasmus / Yle

Sámemusea ja Davvi-Sámi luondduguovddáš Siidda viiddideapmi galggašii gárvánit jahkái 2022 ja dassážii galggašii leat čoahkis maiddái ođđa váldočájáhus. Ruhtadeamis váilu goit ain 1 200 000 euro.

Ođđa čájáhus boahtá máksit oktiibuot 2,5 miljovnna euro. Sámemusea ja Meahciráđđehus juohkiba goluid. Meahciráđđehusa oassi lea juo čoahkis, dan lea sihkkarastán birasministeriija.

Sámemusea ii leat goittot ožžon ruhtadeami iežas ministeriijas nappo oahpahus- ja kulturministeriijas.

– Ministeriija ii doarjjo vuođđočájáhusaid ođasmahttima mange museas. Danin ministeriija ii doarjjo sierra čájáhusa ođasmahttingoluin, dadjá oahpahus- ja kulturministeriija kultur- ja dáiddapolitihka ossodaga bajit hoavda Riitta Kaivosoja.

Museahoavda: "Ruhtadeapmi boahtá ja dat galgá boahtit"

Sámemusea lea čohkkegoahtán iežas oasi vuođđočájáhusa goluin eará ruhtagálduin, ovdamearkka dihte iešguđetlágan ruhtarájuin ja EU prošeaktadoarjagiin.

Mannan vahkus almmuhuvvui, ahte Jenny ja Antti Wihuri ruhtarádju lea juolludan 50 000 euro doarjaga Siidda váldočájáhusa kulturoasi ođasmahttimii. Dát lei vuosttas ruhtadoarjja, man Siida lea ožžon váldočájáhusa ođadeapmái. Ollislaš dárbbus dát submi lea 25. oassi.

Museahoavda Sari Valkonen ii leat goittot vuollánan ja vuordáge ruhtadeaddjiid dál movttáskit ruhtadit ođđa čájáhusa.

– Jos mun livččen ruhtadeaddji, de sihkkarit háliidivččen ruhtadit dákkár fiinna fidnu. Siidda ja sámemusea árvu boahtá loktanit sakka boahttevuođas, ja go musea oažžu jagis 2022 álbmotmusea čoakkáldagas máhcaheami, de dat buktá olu ođđa áššiid.

Sámemusea ja Davvi-Sámi luondduguovddáš Siidda viiddidanbarggut álget giđđadálvve 2020. Seamma áigetávvalis álgá maiddái vuođđočájáhusa ođasmahttin, ja danin ruhtadeami vurdet čielggasmuvvat maŋimustá boahtte jagi bealde.

– Dál eallit gelddolaš áiggiid. Mus lea goittot garra jáhkku dán prošektii. Ruhtadeapmi boahtá ja dat galgá boahtit, dás eai leat eará molssaeavttut, dadjá Valkonen.

Ođasmahttojuvvon ja viiddiduvvon musea lea ulbmil rahpat giđđat 2022.

Varrasamosat: Sápmi

Váldoođđasat

Varrasamosat

Muualla Yle.fi:ssä