Sápmi |

Siidda vuođđočájáhusaid ođasmahttin šaddá duohtan – Suoma kulturruhtarádju mieđihii 400 000 euro

Siida lea dál ožžon oktiibuot 750 000 euro doarjaga.

Saamelaismuseo Siida
Saamelaismuseo Siida Govva: Vesa Toppari / Yle

Sámemusea ja Davvi-Sámi luondduguovddáš Siidda vuođđočájáhusat ođasmahttojuvvojit. Siida lea ožžon 400 000 euro Suoma kulturruhtarájus vuođđočájáhusaid kulturosiid ođasmahttimii.

Sámemusea ja Davvi-Sámi luondduguovddáš Siidda viiddideapmi galggašii gárvánit jahkái 2022 ja dassážii galggašedje gárvánit maiddái ođđa čájáhusat.

Ođđa čájáhus boahtá máksit oktiibuot 2,5 miljovnna euro. Yle Sápmi muitalii golggotmánus, ahte ruhtadeamis váillui ain badjel miljon euro, 1 200 000 euro.

Sámemusea ja Meahciráđđehus juohkiba čájáhusgoluid. Meahciráđđehusa oassi lei juo buriin áiggiin čoahkis, dan sihkkarasttii birasministeriija. Sámemusea ii goittot ožžon ruhtadeami iežas ministeriijas, oahpahus- ja kulturministeriijas, daningo dat ii doarjjo vuođđočájáhusaid ođasmahttima mange museas.

Sámemusea lea ožžon čájáhusaid kulturoassái veahkkeruđa dál Suoma Kulturruhtarájus, Kone foanddas ja Wihuri foanddas, oktiibuot 750 000 euro.

Suopmelaš hápmejeaddji arkiteaktan, sámedáiddárat ráhkadit giehtačállosa

Sámemusea ođasmahttima oktavuođas sámedáiddárat dahket sihke vuođđočájáhusaide ja olgomuseai atmosfearačájáhusgiehtačállosa. Dan bokte galledeaddji sáhttá oahpásmuvvat musea dieđuide sámekultuvrras buorebut.

Sámemusea ja Davvi-Sámi luondduguovddáš Siidda ođđa vuođđočájáhusa arkiteaktan lea válljejuvvon hábmejeaddji Harri Koskinen. Su ovddasvástádussan lea plánet ođđa vuođđočájáhusa čájáhusarkitektuvrra ja gráfalaš hámi, ja bearráigeahččat huksenbarggu.

Varrasamosat: Sápmi

Váldoođđasat

Varrasamosat

Muualla Yle.fi:ssä