Sápmi |

Siiddas fitnan miljovnna čájáhusguossi

Vádjit 20 jagi Sámemusea ja Davvi-Sámi luondduguovddáš Siidda rahpama maŋŋá leat museas fitnan miljon čájáhusguossi.

Sámemusea ja Davvi-Sámi luondduguovddáš Siiddas Anáris galledii bearjadaga musea historjjá miljovnnat čájáhusguossi. Miljovnnat guossi bálkkašedje skeaŋkakoarttain ja Siida-koarttain, mainna beassá nuvttá geahččat Siidda čájáhusaid olles loahppaeallima.

Miljovnnat guossi lei Paolo Moriconi Gaska-Itálias.

– Lean hui ilus. Dát dáhpáhuvai hui vuorddekeahttá, dajai Moriconi.

Siiddas illudit go miljovdna lea olahuvvon justa binná ovdal Siidda 20-ávvujagi. Sámemusea ja Davvi-Sámi luondduguovddáš Siida lea rahppon olbmuide 1.4.1998.

– Gallestalliid mearri muittuha maid das, man dárbbašlaš Siidda boahttevaš viiddideapmi lea, čalmmustahttá Sámemusea Siida ja Davvi-Sámi luondduguovddáš dieđáhusastis. 

Dan áiggis go Siida lea doaibman, de gallestalliid mearri lea rievddadan jahkásaččat. Siidda čájáhusain ja dáhpáhusain leat fitnan geahččamin dábálaččat 44 000-58 000 olbmo jagis.

– Jagis 2016 Siiddas gallededje vehá badjelaš 100 000 olbmo. Čájáhusguossit sis ledje vádjit 60 000, dadjá earenoamáš plánejeaddji Pasi Nivasalo Davvi-Sámi luondduguovddážis Yle Sápmái.

Uksalohkki lohká buot daid, geat leat Siiddas guovlladan. Dát lohku sisttisdoallá čájáhusaid gehččiid lassin maid daid olbmuid, geat leat fitnan Siida Shopis, Meahciráđđehusa bálvalanbáikkis, turistarávvemis ja restoráŋŋa Sarrihis.

Beaiváduvvon 1.12.2017 dii. 15:11 lasihuvvon dieđut galledeaddjiid meriin ja mo galledeaddjiid meriid čuvvot.

Beaiváduvvon 1.12.2017 dii 16:18 lasihuvvon video.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä