Sápmi |

Silbaduojár Krogerus: Silbabájiid oassi olles metallaindustriijas ii leat mearkkašahtti

Ohcejohkalaš silbaduojár Harri Krogerus kommentere Yle Sápmái silba- ja ruvkeságastallama, mii lea bohciidan Ozas-joavkku ovdanbuktimis dán jahkásaš Márkomeannu-festiválas. Krogerus muitala, ahte silbabájistis son duddjo silbbas, mas stuorámus oassi lea ođđasitgeavahuvvon.

Ohcejohkalaš silbaduojár Harri Krogerus
Ohcejohkalaš silbaduojár Harri Krogerus Govva: Laura Pieski/Yle

Gaup oappážiid ođđa musihkka- ja dáiddajoavku Ozas lea álggahan ságastallama sápmelaččaid silbbaid geavaheamis ja sámiid dálá eallinvuogi birra. Ohcejohkalaš silbaduojár Harri Krogerus oaidná, ahte silbačiŋaid geavaheapmi ii leat dat vuosttas ášši, masa galggašiii darvánit.

Krogerus muitala, ahte son lea barggustis ferten smiehttat seamma gažaldagaid, maid Ozas-joavku dál bovttii.

– Iešge lean dieđusge gártan smiehttat dáid seamma gažaldagaid sihke iežan barggu ja maiddái luonddu bealis, go ieš deattuhan ruoná árvvuid ja liikon guorahallat daid máilmmeviidosaččat.

Krogerus geavaha bájistis silbba, mas stuorámus oassi ođđasitgeavahuvvon.

– Mun oasttán iežan silbba dakkár báikkis, ahte dain 60-70 proseantta lea ođđasitgeavahuvvon.

Silbaduojár lohká, ahte silbba oassi lea dušše duhátoassi dan veaikkis ja siŋkkas, mii Suoma ja Ruoŧa ruvkkiin roggojuvvo.

Livččii baicce dehálut ruovttuin figgat doalvut metalla- ja lássaburkkiid ođđasitgeavahussii

– Dieđusge ferten mieđihit, ahte jurddašan dán ášši iežan geahččanguovllus, muhto jus guorahalla ášši vaikko nu, ahte dákkár smávva silbabádji geavaha silbba eanemustá guokte kilo jahkái.

– Dan vuođul livččii dehálut ruovttuin figgat doalvut metalla- ja lássaburkkiid ođđasitgeavahussii. Dáid burkkiid mearri lea sihkkarit stuorát go dat, maid okta silbaduojár geavaha bájistis jagis. Ná mun lean vuoigadahttán iežan silbadujiid ehtalaččat.

Krogerus muittuha, ahte silbaduojára áiggis stuorámus oassi ii gola silbadujiid vuovdimii ja ovddosguvlui jođiheapmái. Áigi gollá metalla gieđahallamii ja hábmemii.

Dasa lassin son lohká, ahte sámiid silbbaid geavaheapmi ii leat nu mearkkašahtti, go ovdamearkka dihtii duháhat kilot metalla geavahuvvo ođđa biiillaide ja mohtoriidda.

Ii jáhke olbmuid heaitit silbadujiid oastima

– Oppalaččat buotlágan ođđa dávviriid oastima ja golaheami fertešii geahpedit jo min luonddu gierdama geažil.

Krogerus ii goit jáhke, ahte olbmot heitet silbadujiid oastima. Son lea dan oaivilis, ahte gánneha jurddašit dakkár geavatlaš áššiid, main lea stuorra váikkuhus. Son namuha dán oktavuođas borramuša.

– Sámit borret eanemusat bohccobierggu, luonddučáziid guoli, murjjiid ja guobbariid. Dáid váikkuhus dálkkádahkii lea olu unnit go industriijabuvttaduvvon bierggus.

Varrasamosat: Sápmi

Váldoođđasat

Varrasamosat

Muualla Yle.fi:ssä