Sápmi |

Silbagávpi manaha oktorievtti geavahit sámi beaivváš-symbola – "Beaivváš lea beassan friija dál"

Tana Gull og Sølvsmie -fitnodat sáhttá ain gieldit earáid geavaheamis symbola. Láhkačeahppi goit oaivvilda, ahte silbarávdi ii oamas šat beaivváža.

Gurotbealde lea beaivváš, mii lea registerejuvvon Tana Gull og Sølvsmie -fitnodaga designmearkan. Olgešbealdeges lea sin dávvirmearka.
Gurotbealde lea beaivváš, mii lea registerejuvvon Tana Gull og Sølvsmie -fitnodaga designmearkan. Olgešbealdeges lea sin dávvirmearka. Govva: NRK Sápmi

Norgga pateantastivra lea bissehan beaivváš-symbola registrerema Tana Gull og Sølvsmie -fitnodaga designmearkan. Áššis muitala NRK Sápmi.

Geassemánus pateantastivra oaččui váidaga das, go Deanu golle- ja silbarávdi lei beassan registreret beaivvášsymbola alcces designmearkan. Ággan váidagii lei, ahte dat lea dološ sámi symbola, iige ođđasit hábmejuvvon.

Dál váidda lea meannuduvvon ja silbarávdi manaha oktovuoigatvuođa beaivvážii. Pateantastivrra ossodathoavda Andreas Bostad muitala, ahte ledje máŋggat sivat, manin dán desingmearkka sihkko eret designregistaris.

Vaikko Tana Gull og Sølvsmie -fitnodat massá oktovuoigatvuođa sámi beaivváš-symbola hápmái dahje designii, de lihkká dat sáhttá ain gieldit earáid ávkkástallamis symbolain, namalassii danin, go sii leat registreren beaivváža iežaset dávvirmearkan jo jagis 2009.

– Jus dávvirmearkka registreren seailu, de sis lea vejolašvuohta gieldit earáid geavaheamis symbola dávvirmearkan, čilge Andreas Bostad NRK Sápmái.

Somby: Silbarávdi ii oamas symbola – beaivváš lea friija dál

Ánde Somby, guhte lea Romssa universtitehta juridihkalaš ossodaga vuosttaš amanueansa, dadjá ahte beaivváš lea dál friija.

– Dat mearkkaša dan, ahte Deanu silbarávdi ii oamas šat beaivvášsymbola, dajai Somby davviriikkalaš Buorre Iđit Sápmi -sáddagis gaskavahkkoiđit.

Somby mielas Deanu silbarávdi ii sáhte gieldit beaivvášsymbola geavaheami earáin.

– Olbmot gal ožžot dál dorvvolaččat geavahit beaivváš-symbola. Dál ferte vuordit, mo gálvomearkka meannudeapmi manná viidáseabbot pateantastivrras.

Ánde Somby
Jurista ja dáiddár Ánde Somby oaivvilda, ahte sámi duojárat ožžot dás duohkoge geavahit beaivváš-symbola. Govva: Elvi Rosita Norvang / NRK

Somby lohká, ahte son ieš gal áigu dás duohkoge geavahit duddjomis beaivvášsymbola.

– Diet lea nu máŋgga jus-sáni duohken. Mun gal boađán duojárin ain geavahit beaivváža. In jáhke, ahte giige boahtá hástalit mu dan geavaheamis.

Somby jáhkká, ahte gálvomearka ii leat nu nanus. Pateantastivrra mearrádus lea su mielas máilmmi fiinna ođas duojáriidda.

– Mun navddán, ahte beaivváš lea geavatlaččat gehččojuvvon friijan dál. Somá, go beaivváš bođii ná skábman sámi duojáriidda.

Geassit duoldagođii beaivváža birra

Mannan geasi bekkii olu, go Tana Gull og Sølvsmie álggii oamastallat sámiid dovddus ja dološ symbola. Máŋgasat reagerejedje garrasit ja moite dan, go okta fitnodat eaiggádišgođii symbola.

Geassit fitnodat maid celkkii, ahte sii eai leat goassige bivdán oktorievtti symbolii. Fitnodaga mielde sii leat dušše viežžan inspirašuvnna dološ sámi symbolas ja sárgon das iežas symbola.

Jagis 2014 dohkkehii pateantastivra beaivváš-designsymbola Tana Gull og Sølvsmie -fitnodahkii. Váidima maŋŋá pateantastivra gieđahalai ášši ođđasit ja dál de mearridii sihkkut symbola designregistaris eret. Beaivvášsymbola lea goit ain sin dávvirmearka.

Dál silbarávddis lea moadde mánu áigi váidit pateantastivrra mearrádusas. Deanu silba- ja gollerávdi Ragnhild Rajala-Lautz čállá NRK Sápmái, ahte sii áigot iskat pateantastivrra mearrádusa ja vuordit, maid pateantastivra mearrida dávvirmearkaáššis.

Ásllaga Á-studio gieđahalai ášši iežas sáddagisttis geassemánus.

Varrasamosat: Sápmi

Váldoođđasat

Varrasamosat

Muualla Yle.fi:ssä