Sápmi

Skábmagovaid festiválaávžžuhus: Unnimus gussiide fállun máinnasbottut, nuoraide ja earáide fas panelaságastallan váikkuheami vejolašvuođain

Tarja Porsanger
Sámedikki filbmaguovddáš Skápma plánejeaddji Tarja Porsanger muitala, ahte festivála fálaldagat mánáide ja nuoraide leat nuvttá. Govva: Vesa Toppari / Yle

Filbmaguovddáš Skápma plánejeaddji Tarja Porsanger ja Sámedikki nuoraidčálli Elli-Marja Hetta muitaleaba festivála fálaldagas mánáide ja nuoraide.

Dego muđuige Skábmagovat-festivála, de maiddái virtuála festivála álgá mánáid ja nuoraid beivviin.

Dán háve skuvlamánáide lea fállun okta guhkes filbma, man namma lea Aamu stuorra liidni. Dan sáhttá geahččat sihke davvisámegillii ja suomagillii. Filmma lea bagadallan Lucie Lambert, ja das ovttastuvvet máidnasat ja dokumentára. Oassi lea govvejuvvon materiála ja oassi fas lea animašuvdna.

Sámedikki filbmaguovddáš Skápma plánejeaddji Tarja Porsanger muitala, ahte filbma lea hui áigeguovdil ja miellagiddevaš: das smihttojuvvo, mas máilbmi lea dahkkon ja mii lea riggodat.

Aamu stuorra liidni
Aamu stuorra liidni -filmma lea bagadallan Lucie Lambert. Govva: Lucie Lambert, Les films du tricycle

Lassin skuvlamánáide lea fállun Unna Junná virtuálalaš máinnasčállinboddu. Mánáid ja nuoraid festivála unnimus gussiide Sámedikki mánáidkulturguovddáš Mánnu lea ordnen máinnasbottuid. Bottut leat davvisámegillii, nuortalašgillii ja anárašgillii.

Sihke máinnasbottuide ja Unná Junná máinnasčállinboddui ferte almmuhit ovddalgihtii. Muđui mánáid ja nuoraid filmmat oidnojit Suomas, Norggas ja Ruoŧas.

Mánáid ja nuoraid Skábmagovat álgá bearjadaga 29.1. ja fálaldagat leat nuvttá. Filmmaid sáhttá geahččat olles bearjadatbeaivvi neahttabálvalusas. Daid geahččamii gáibiduvvo registreren bálvalussii.

Váldofestivála rahpandoalut álget bearjadaga diibmu 19.00.

– Rahpansáddaga prográmma lea dakkár, ahte dan sáhttá geahččat olles bearrašiin, muittuha Tarja Porsanger.

Guldal dás, go Sámedikki filbmaguovddáš Skápma plánejeaddji Tarja Porsanger muitala mánáid ja nuoraid beaivvis. Jietna: Laura Pieski / Yle

Nuoraide oanehisfilbmačájáhus ja panelaságastallan

Nuoraide fállun lea oanehisfilbmačájáhus. Oasi filmmain leat nuorat dahkan ieža diimmá festiválas. Dalle festiválas lei filbmabargobádji sáme- ja maorinuoraide.

Sámedikki nuoraidráđi panelaságastallan lea nubbi fálaldat sihke nuoraide ja eará festiválagussiide. Panelaságastallama fáddán lea váikkuheami máŋggat hámit. Panelas gieđahallet sápmelaš váikkuheami ja váikkuheami iešguđetlágan bálgáid.

Panelistan mielde leatge ráp-artista Ailu Valle, musihkkár Anna Lumikivi, sámeaktivista Ida-Maria Helander ja badjealmmái ja Yle Sámi doaimmaheaddji Ásllat Paltto.

Nuoraidráđđi lea dán rádjai leamašan measta juohke jagi mielde ordnemin veahkkin nuoraidbeaivvi. Sámedikki nuoraidčálli Elli-Marja Hetta muitala, ahte nuoraidráđis leat ságastallan ja plánen, mii livččii sin oasil heivvolaš prográmma dán jahkái.

– Mearrideimmet panela ordnet. Fáddá boahtá das, go nuoraidráđi jagi 2021 váldofáddá ja temá, masa min doaimmat vuođđuduvvet, lea váikkuheapmi ja sámenuoraid oasálašvuohta sámeservodagas, čilge Hetta.

Elli-Marja Hetta
Sámedikki nuoraidčálli Elli-Marja Hetta mielde nuoraidráđi nuorat leat ieža plánen panelaságastallama sisdoalu. Govva: Xia Torikka / Yle

Panelaságastallan govvejuvvo ja báddejuvvo ovddalgihtii. Dan sáhttá geahččat festivála áigge goas beare. Ságastallama leat heivehan sihke nuoraide ja buohkaide, geat leat beroštuvvan váikkuheamis ja sámenuoraid áššiin.

Nuoraidráđi lahtut leat ieža plánen panela sisdoalu ja gažaldagaid. Dainna lágiin nuorat ieža leat leamašan guovddážis plánenmuttus.

– Mii leat dan sisdoalu ja gažaldagaid plánen maiddái dien geahččanguovllus, ahte mis leat sámenuorat, muhto maiddái eará festiválaguossit doppe geahččamin ja čuovvumin dan panela, muitala Hetta.

Guldal dás nuoraidčálli Elli-Marja Hetta jearahallama. Jietna: Laura Pieski / Yle

Skábmagovaid festiválaávžžuhusat juohke beaivve

Eamiálbmogiid filbmamáilmmis dehálaš filbmafestiválan šaddan Skábmagovat álgá dán vahku bearjadaga 29.1. virtuálalažžan.

Skábmagovaid festiválavahkus beasat lohkat ja gullat festivála lágideddjiid tipssaid ja ávžžuhusaid festiválaprográmmas.

Dán jagi festiválatemán leat searvvušlašvuohta ja sámefilmmat – vajálduhtekeahttá eará álgoálbmogiid filmmaid.

Festivála dáiddalaš jođiheaddji Jorma Lehtola, filbmaguovddáš Skápma plánejeaddji Tarja Porsanger, buvttadeaddji Taru Arrela ja Visuálalaš Sápmi -fidnu prošeaktahoavda Minna Lipponen muitalit iežaset festiválaávžžuhusaid Yle Sámi kanálain juohke beaivve dán vahkus.

Varrasamosat

Muualla Yle.fi:ssä