Sápmi

Skábmagovaid filbmaávžžuhusat -ráidu álgá fas – loga dás vahku vuosttas ávžžuhusaid!

Jorma Lehtola
Skábmagovaid dáiddalaš jođiheaddji Jorma Lehtola. Govva: Kevin Francett / Yle

Vuosttas filbmaávžžuhusaid addá dáiddalaš jođiheaddji Jorma Lehtola perulaš ja kanádalaš filmmain.

Eamiálbmogiid filbmamáilmmis dehálaš filbmafestiválan šaddan Skábmagovat lea fas dán vahkus Anáris.

Skábmagovat čohkke juo 22. geardde filbmadahkkiid ja kulturberošteaddjiid miehtá máilmmi geahččat eamiálbmotfilmmaid. Festivála álgá duorastaga 23.1. ja bistá gitta sotnabeaivái 26.1. Dán jagi temán lea oktavuohta eatnamii. Festivála váldoguossit bohtet Mátta-Amerihkás, earenomážit Perus.

Festivála dáiddalaš jođiheaddji Jorma Lehtola, veahkkebuvttadeaddji Anni Koivisto ja filbmaguovddáš Skábma plánejeaddji Tarja Porsanger addet iežaset filbmaávžžuhusaid Yle Sámi kanálain juohke beaivve dán vahkus.

Neahta lassin ávžžuhusat gullojit rádios beaivválaččat Yle Sámi iđitsáddagis diibmu 7.00–8.00 ja nuppádassii veaigin Dearvva! Tiervâ! Tiõrv! -sáddagis diibmu 14.30–16.00.

Vuosttas ávžžuhusat leat pioneerafilmmat ja Kanáda buoremus filbma

Skábmagovat-filbmafestivála dáiddalaš jođiheaddji Jorma Lehtola lea válljen vuosttas ávžžuhusaide pioneerafilmmaid.

Son ávžžuha olbmuid fitnat geahččamin Wiñaypacha (bag. Óscar Catacora), Sgaawaay K'uuna (bag. Gwaai Edenshaw ja Helen Haig-Brown) ja The Body Remembers When the World Broke Open (bag. Elle-Máijá Tailfeathers ja Kathleen Hepburn).

– Mis leat olu buorre filmmat, muhto sáhtášii álggahit pioneerafilmmaiguin. Eatge dieđusge sáhte vajáldahttit Elle-Máijá Tailfeathers vuosttas guhkesfilmma, mii válljejuvvui gieskat Kanáda buoremus filbman.

Ná Jorma Lehtola muitala filmmaid birra.

Wiñaypacha (Eternity)

"Dát filbma lei Peru Oscar-evttohassan mannan jagi. Dat lea máilmmi vuosttas aimaragielat filbma, nappo dál lea vejolašvuohta gullat aimaragiela, jus ii leat dan ovdal gullan.

Filbma čuovvu Andi-váriin boares pára, guhte vuordá bártnis guossái."

WINAYPACHA
Wiñaypacha leamaš Peru evttohas Oscar-bálkkašupmái. Govva: Skábmagovat

Filbma čájehuvvo bearjadaga diibmu 11.00 sámekulturguovddáš Sajosis ja nuppádassii sotnabeaivve diibmu 16.00 sámemusea Siiddas.

Sgaawaay K'uuna (Edge of the Knife)

"Dát lea máilmmi vuosttas haidagielat filbma, mii boahtá Kanádas. Haidagiela hállet dušše moaddelot olbmo, nappo dát filbma lea leamaš maiddái dego giellabargobádji.

Sgaawaay K'uuna
Sgaawaay K'uuna lea erenoamáš áitatvuloš haidagillii. Govva: Skábmagovat

Dát lea myhtalaš filbma albmás, guhte doalvvui vieljas bártni jápmimii. Son ii gierdda sivalašvuođa ja báhtara dálvái meahccái. Doppe muhtašuvvá Gaagiidan, monsteran, man nealgi biinnida. Su galgá gádjut ruovttoluotta olmmožin. "

Sgaaway K'uuna čájehuvvo lávvardaga diibmu 15.00 sámekulturguovddáš Sajosis.

The Body Remembers When the World Broke Open (Rumaš muitá go máilbmi rahtasii)

"Dát lea sámi-blackfoot filbmabagadalli Elle-Máijá Tailfeathers vuosttas guhkes filbma. Filbma válljejuvvui mannan jagi Kanáda buoremus filbman. Elle-Máijá galggašii leat ieš maid báikki alde. Filbma vuođđuduvvá Elle-Máijjá iežas vásáhussii.

The body remembers when the world / Rumaš muitá go máilbmi rahtasii
Elle-Máijá Tailfeathersa vuosttas guhkesfilbma lea beaggán bures. Govva: Skábmagovat

Son deaivvai gáhta alde nuorra eamiálbmotnissona, guhte lei álásjulggiid báhtaran veahkaválddálaš albmás. Filbma govvida dan proseassa, mo oažžut dan nissona dorvui. Filbma lea measta dokumentáralágan, ja hui fiidnát govvejuvvon.

Filbma čájehuvvo lávvardaga diibmu 12.00 sámekulturguovddáš Sajosis.

Skábmagovaid olles prográmmakárta ja lassidieđut filmmain gávdnojit festivála neahttasiidduin.

Varrasamosat

Muualla Yle.fi:ssä