Sápmi |

Skábmagovat 2018 -prográmma almmustahtton – Yle Sápmi mielde ordnemin lávvoságastallama

Álgoálbmogiid filbmafestivála Skábmagovat lágiduvvo Anáris 25.- 28.1. 2018 juo guoktelogát geardde. Festiválas čalmmustahttet Davvi-Amerihká filmmaid.

skabmagovat
Skabmagovat leat Anáris 25.- 28.1. 2018 Govva: Skábmagovat

Skábmagovat-filbmafestivála ávvojagi prográmma lea almmustahtton. Jagi 2018 temát leat Davvi-Amerihkká ja Ellos eallin.

– Davvi-Amerihkká oidno min prográmmas nu, ahte mis leat olu oanehisfilmmat ja moadde guhkit filbmage doppe. Standing Rock -ealligovaid, Rise 1 ja Rise 2, bagadalli Michelle Latimer lea okta dán jagi gudnegussiin. Mii maiddai čájehit su Rise-ealligovaid min festiválas, muitala Skábmagovaid buvttadeaddji Aleksi Ahlakorpi.

Dán jagi festiválas leat badjel golbmalogi filbmačájáhusa ja čájehuvvo badjel guhttalogi sierra filmma.

Bileahtaid filbmačájáhusaide sáhttá várret Skábmagovaid interneahttasiiddus, gos sáhttá maid dutkat Skábmagovaid 2018 prográmma.

Suoma vuosttaseahkedis aboriginála western

Skábmagovaid buvttadeaddji Aleksi Ahlakorpi dadjá, ahte Skábmagovat-festivála lea dáhpáhusvahkuloahppa, muhto váldooasis leat goittotge álgoálbmogiid filmmat.

Aboriginála western, Sweet Country oažžu Skábmagovain Suoma vuosttaseahkeda. Filbma lea ožžon bálkkašumiid filbmafestiválain miehtá máilmmi. Filbma vuittii guokte bálkkašumi Venetsia filbmafestiválas čakčat 2017.

Skábmagovat-filbmafestivála čájeha juohke jagi varrasamos sámi filmmaid. Dán jagi Sámevarra-filmma lassin prográmmas leat maid sámi oanehisfilmmat.

– Anders Sunna ja Inga Wiktoria Påve bálkkašuvvon oanehis animašuvnna lea vejolaš beassat geahčat Anáris ja dasa lassin leat maid oanehisfilmmat Marja Helanderis, Per-Josef Idivuomas, Egil Pedersenis, Lada Suomenrinnes ja Katja Gauriloffis, muitala Ahlakorpi.

Sofia Jannokis konsearta

Skábmagovat-filbmafestivála prográmmas lea ealligovaid lassin maid eará kultuvra. Sámemusihka násttiin Niillas Holmbergin ja Sofia Jannokiin leat konsearttat festivála oktavuođas.

Holmberg konsearta loaiddasta bearjadaga ovttas estteeanalaš Siiri Sisaskiin ja Jannok fas lávvardaga Skábmagovaid eahketdoaluin.undefined

Ávvojagi gudnin lágiduvvo ovttas Yle Sámiin vuosttas háve Skábmagovaid lávvoságastallan, Ellos eallin. Ságastallan almmustahtto festiválaid áigge Yle Areenas.

– Ellos eallin -ságastallamis leat fárus aktiivvalaš sápmelaččat earret eará Ellos Deatnu -joavkkus, muitala Ahlakorpi.

– Dasa lassin lávvardaga lea sátnefriddjavuohtapanela, masa oassálastet Sofia Jannok ja soapmásat min Davvi-Amerihká gussiin, čilge Ahlakorpi.

Álgoálbmogiid filbmafestivála Skábmagovat lágiduvvo Anáris 25.- 28.1. 2018, dál juo guoktelogát geardde.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä