Sápmi |

Skábmagovat 2019 prográmma lea almmustahttojuvvon –Váldotemán lea árktalaš eamiálbmogiid ealligovva

Veahkkebuvttadeaddji mielde jagi váldotemá oidno earret eará Alaskas boahtti WE UP! –dokumeanttas, mii muitala rap-musihka birra.

Skábmagovat-filbmafestivála veahkkebuvttadeaddjin bargá anárlaš Minna Lipponen. Jietna: Yle Areena. Govva: Inger-Elle Suoninen / Yle

Skábmagovat-eamiálbmogiidfilbmafestivála prográmma lea almmustahttojuvvon. Skábmagovaid 20 jagi ávvojagi váldotemán lea árktalaš eamiálbmogiid ealligovva.

Skábmagovat-filbmafestivála veahkkebuvttadeaddji Minna Lipponen lei guossin Yle Sámi iđit -sáddagis muitaleame dán jagaš festivála birra.

– Dán jagi mii háliidit čájehit dan árktalaš guovllu ja ovttasbargovejolašvuođaid, mat mis ovttas leat. Mii sáhttit ovddidit áššiid ja dahkat eanet ovttas árktalaš guovlluin, muitala Lipponen dán jagaš váldotemás.

Lipponen muitala, ahte buoremus ovdamearkka dan ovttasbarggus lea Priscilla Naungagiaq Hensley (iñupiaq) ja David Holthouse
bagadallan filbma WE UP!, mii boahtá Alaskas. Skábmagovain muitalit, ahte WE UP! -dokumeanta johtá miehtá árktalaš guovlluid Alaskas Ruonáeatnamii ja Sápmái, ja dat muitala nuorra dáiddáriin ja sin sivain dahkat dáidaga.

– Dat lea dokumeantta rap-musihka birra ja dat čájeha, man viidát dat fierpmádagat leat musihka birra.

Jagi 2019 Skábmagovat-filbmafestivála plakáhta.
Jagi 2019 Skábmagovat-filbmafestivála plakáhta. Plakáhta leat hápmen Sunna Kitti. Govva: Sunna Kitti / Skábmagovat

Badjealbmá čalmmiiguin -dokumeanta máilmmi vuosttašeahket Skábmagovain

Festiválii bohtet dokumeanttat maiddái Sámis. Ovdamearkka dihte Ellen-Astri Lundby bagadallan filbma Brennende minner (sá: Buolli muittut) mii muitala das, go jagis 1944 75 000 siviila olbmo Davvi-Norggas gárte báhtarit duiskalaččaid ja Aslak Paltto bagadallan Badjealbmá čalmmiiguin -dokumeanta, mii rahpá uvssa badjeolbmo árgabeaivái. Dán dokumeanttas lea máilmmi vuosttašeahket Skábmagovain.

Skábmagovat-filbmafestiválas lea vejolaš geahččat filmmaid maiddái guovssahasteáhteris. Dat lea ealligovvateahter, mii lea huksejuvvon oalát muohttagis. Skábmagovaid veahkkebuvttadeaddji Minna Lipponen muitala, ahte guovssahasteáhtera huksenbargguid eai leat vel álggahange.

– Dat lea álot vahku ovdal dat huksenbargu.Mu mielas ihttin galggašii muohttit, ahte oažžut dan veahá lasi, boagusta Lipponen ja čujuha dasa, go Anáris ii leat nu beare ollu muohta.

Skábmagovat-filbmafestivála ordnejuvvo Anáris 24.–27.1.2019. Festiválaprográmma gávnnat dáppe. Skábmagovaide bohtet guossit earret eará Saha dásseválddis, Ruonáeatnamis ja Alaskas.

Varrasamosat: Sápmi

Váldoođđasat

Varrasamosat

Muualla Yle.fi:ssä