Sápmi |

Skábmagovat deavdá 20 jagi – Festivála čájeha dan gudnin árktalaš eamiálbmogiid filmmaid

Dáiddalaš jođiheaddji Jorma Lehtola muitala, ahte boahtte jagi festiválas beassá návddašit filmmain earret eará Sámis, Kanadas, Alaskas, Ruonáeatnamis ja Ruoššas.

Jorma Lehtola
Skábmagovaid dáiddalaš jođiheaddji Jorma Lehtola. Govva: Vesa Toppari / Yle

Eamiálbmogiid filbmafestivála Skábmagovat deavdá 20 jagi. Ávvujagi gudnin festivála čájeha boahtte ođđajagimánus Anáris árktalaš eamiálbmogiid filmmaid.

Dáiddalaš jođiheaddji Jorma Lehtola muitala, ahte boahtte jagi festiválas beassá návddašit filmmain earret eará Sámis, Kanadas, Alaskas, Ruonáeatnamis ja Ruoššas.

– Ruošša eamiálbmogiid dilli lea erenoamáš miellagiddevaš, daningo doppe leat álgán ráhkadit eanet filmmaid. Ovdamearkka dihte Saha dásseválddis (Jakutia) buvttadit vátna ruđaiguin fiinna filmmaid. Dat lea miellagiddevaš, Lehtola muitala.

Ruoššas buvttaduvvon eamiálbmotfilmmaid čohkke Skábmagovaide filbmabuvttadeaddji ja kuráhtor Sardana Savvina, gii lea eret Saha dásseválddis.

Lehtola namuha oktan erenoamaš ealligovvan boahtte jagi festiválas máilmmi vuosttas haidagielat ealligova. Edge of the knife -nammasaš filmma lea buvttadan inuihtafilmmaid ofelaš, filbmabagadalli Zacharias Kunuk. Filmmas hállojuvvo erenoamáš áitatvuloš haidagiella, mas ledje jagi 2012 dušše 14 hálli.

– Mearkkašahtti ášši dán ealligovas lea aiddo fal dat giella. Measta buot haidagiela hállit leat mielde dán filmmas ja giella leamašge okta dan vuolggasajiin. Filbma sisttisdoallá maiddái giellagáhttema ja -rávvema. Lea miellagiddevaš oaidnit, makkár váikkuhusat dákkár guhkes ealligovas leat giellaealáskahttinbarggus, Jorma Lehtola smiehttá.

Skábmagovat
Govva: Ville Fofonoff

Ávvudit maiddái eamiálbmogiid ovttasbarggu

Vaikko Sámi boarrásamos filbmafestivála 20 jagi bálggis lea ávvudanveara, ii dat suige leat áidna sivva ávvudit.

Skábmagovaid dáiddalaš jođiheaddji Jorma Lehtola muitala, ahte festivála hálida boahtte jagi loktet oidnosii ja ávvudit maiddái árktalaš eamiálbmogiid ovttasbarggu ja gulahallama.

– Árktalaš eamiálbmogiid ovttasbargu lea nannosut go goassige ovdal. Dalle moaddelot jagi dassá, go mii álggaheimmet, eamiálbmogat illá barge ovttas. Skábmagovat lea okta máilmmi boarrásamos eamiálbmogiid filbmafestiválain, ja dán áigge dat leat jo miehtá máilmmi. Ovttasbargu lea lassánan mealgat.

– Maiddái filbmafálaldat lea sturron. Go ovdal gárttaimet duođas smiehttat, gos fidnešeimmet čuovvovaš festiválii filmmaid, de dán áigge dat leat fállun nu ollu, ahte beassat válljet dain buoremusaid ja heivvolamosiid, Lehtola joatká.

Skábmagovat lágiduvvo boahtte ođđajagimánu 24.–27. beivviid.

Varrasamosat: Sápmi

Váldoođđasat

Varrasamosat

Muualla Yle.fi:ssä