Sápmi |

Skábmagovat filbmafestivála ordnejuvvo boahtte jagi – lágideaddjit gergosat ordnet festivála ollásit gáiddusin dahje hybridahámis

Koronavirusa dagahan spiehkastatdilli váikkuha maiddái Skábmagovat-filbmafestivála ordnemii.

Yleisöä Skábmagovat-elokuvajuhlassa.
Skábmagovat ordnejuvvo boahtte jagi. Koronadilli váikkuha festivála ordnemiidda. Govva: Vesa Toppari / Yle

Álgoálbmogiid filbmafestivála Skábmagovat ordnejuvvo boahtte jagi ođđajagimánus. Festivála lágideaddjit háliidit fállat olbmuide viiddes filbmalávddi ja iešguđet dáidda- ja kulturfálaldagaid koronadilis fuolakeahttá.

Festivála temán jagis 2021 leat searvvušlašvuohta ja sámefilmmat – vajálduhtekeahttá eará álgoálbmogiid filmmaid.

Festivála álgá guovtti diimmu guhkkosaš rahpansáddagiin, mii sáddejuvvo gáiddusin. Rahpansátta lea rabas buohkaide. Rahpandoaluin fállet máŋggabealat dáiddafálaldaga, mii sisttisdoallá earret eará oanehis filmmaid, jearahallamiid, musihka ja performánsadáidaga.

– Vaikko eat vealttakeahttá sáhtege dán dilis ovttas čoahkkanit návddašit filmmain davás, de mii goittotge geahččalit buoremus lági mielde bargat nu, ahte buohkat besset vásihit eakti Skábmagovat-filbmafestivála atmosfeara – vaikko vel gártatge dahkat sierranas ordnemiid, muitala Skábmagovat filbmafestivála buvttadeaddji Taru Arrela dieđáhusas.

Koronadilli vuhtiiváldojuvvo festivála ollašuhttimis

Koronadilli váikkuha filbmafestivála ordnemii.

Buot festivála dáhpáhusaid plánemis vuhtiiváldet pandemiijadili ja dorvvolašvuođa. Festivála čuovvu dárkilit eiseválddiid rávvagiid ja lea ráhkkanan koronadili vearráneapmái nu, ahte festivála lea vejolaš ollašuhttit digitálalažžan.

Jus fal pandemiijadilli ráfoda ja lea vejolaš, festivála čájeha muhtun filbmačájáhusaid Anáris guovllu olbmuide. Dorvvolašvuohta váldojuvvo vuhtii leš dal festivála ollásit gáiddusin dahje hybridahámis.

Festivála sávvá joksat unnimusat fásta gussiid ja maiddái vejolaččat ođđa gehččiid digitála festivála bokte.

Skábmagovat-filbmafestivála ordnejuvvo 29.–31.1.2021.

Varrasamosat: Sápmi

Váldoođđasat

Varrasamosat

Muualla Yle.fi:ssä