Sápmi |

Skihpárat, ođđa áššiid oahppan ja stoahkan geasuhit Gáregasnjárgga mánáid iskkárii – iskkárdoaibma lea ealáskan Ohcejoga gielddas

Skábmamánu álggus Njálat-leavgagotti iskkárdoaibma lea fas virkkosmuvvan Ohcejoga gielddas. Gáregasnjárggas nuorra iskkárat illudit, go besset oahppat ođđa áššiid skihpáriiguin.

Video: laaja oskari.jpg
Geahča videos maid nuorra iskkárat leat oahppan ja manin sii háliidit johttit iskkáris. Govas iskkár Oskari Halonen. Video: Kirsti Länsman, Sáárá Seipiharju / Yle

Gáregasnjárgga kapealla šilljui leat čoahkkanan logemat máná stoahkat ja oahpahallat ođđa dáidduid, go Njálat-leavgagotti ja iskkárdoaimma leat ealáskahttán Ohcejoga gielddas dán čavčča.

Buot iskkárat oaivvildit, ahte iskkáris lea somá. Iŋgá Rasmus lea boahttán iskkárii, danin go doppe leat skihpárat ja oahppá somás áššiid, dego čuolmmaid ja stohkosiid. Son ii dieđe vel maid vuordá, ahte oahppá iskkáris, muhto háliida oahppat ođđa áššiid.

Oskari Halonen mielas buot buoremus ášši iskkáris lea dat, ahte doppe beassá muhtumin láibut ja stoahkat.

Siiri Paltto mielas fas somámus lea, go iskkáris leat skihpárat. Son lea oahppan geavahit trangia ja málestit dainna.

– Gal mun lean geavahan dan leairras, Paltto muitala ja lasiha vel, ahte málestii dainna nudeliid.

Dehálamos le, ahte mánáin lea suohtas

Ohcejoga searvegotti nuoraidbargi ja iskkára jođiheaddji Ville Orjala lea juohke vahkus jođiheamen iskkára sihke Gáregasnjárggas ja Ohcejogas.

Orjalai dehálamos lea, ahte mánáin lea suohtas iskkáris. Son maid sávvá, ahte muhtun gaskkas sii beasašedje maid ovttastallat eará iskkáriiguin.

– Juos dat koronadilli ložže, de beasašeimme iskkárleirii ovttas Lappi iskkáriiguin. Dakkár vuordámušat mus leat, ahte doaibma livčče jođus vel moadde jagi geahčenge, son boagusta.

Ville Orjala
Ohcejoga searvegotti nuoraidbargi ja iskkára jođiheaddji Ville Orjala lea ieš maid mánnán johtán iskkáris, ja su mielas dat lea buorre buđaldus buohkaide. Govva: Kirsti Länsman / Yle

Orjalas leat vásáhusat sihke das, ahte son lea ieš mánnán leamašan iskkáris, muhto son lea maid doaibman iskkárjođiheaddjin ovdalge.

– Iskkár lea buohkaide, ja luondduášši lea dehálaš ja dat lea hui buorre buđaldus nuoraide ja mánáide.

Mánáide iskkárdoaibma álggii easkka skábmamánu álggus, muhto doaimma ealáskahttin lea álgán jo árrat.

– Čakčamánus álggii, go mis lei iskkárjođiheaddji skuvlejupmi Soađegilis ja nubbi jođiheaddji Leena Niittyvuopio-Jämsä lei munnje oktavuođas jo geasit dán áššis. Dalle dat idea lea álgán, muhto skábmamánus álggii ieš doaibma.

njálat partio
Dán vuoru iskkáris plánejedje oktasaš njuolggadusaid vai buohkain livčče suohtas. Govva: Kirsti Länsman / Yle

Sávaldat livčče ordnet bearašiskkára boahtteáiggis

Iskkár lea Gáregasnjárggas álo vuossárgga ja Ohcejogas maŋŋebárgga. Iskkára jođiheaddji Ville Orjala muittuha, ahte vaikko doaibma lea jo álgán, de ođđa mánát leat ain buresboahtin iskkárii.

– Iešguđege ahkásaččaide leat sierra iskkárprográmmat, muhto mis go leat nu unnán mánát, de leat ferten vehá ovttastit, ahte dán joavkkus mis leat vuolledási ahkásaš mánát.

Ohcejogas fas lea maiddái boarrásut iskkáriid joavku, mas leat badjedási ahkásaš nuorat.

Orjala muittuha, ahte maiddái rávesolbmot leat buresboahtin ja sidjiide gávdnojit maiddái barggut iskkáris.

– Mii sávvat, ahte beasašeimmet álggahit bearašiskkára, mas vaikkoba unnamánáid bearrašat beasašedje ovttas oassálastit iskkárdoibmii.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä