Sápmi |

Skuvlalaččaide fállet dáidda- ja mediabajásgeassima maid golmma sámegillii – Marja Helandera filbmaduodji bidjá nuoraid smiehttat birrasa

Buvttadeaddji Helka Heinonen lea ilus, go materiála lea fállun maid golmma sámegillii.

Marja Helander (Dolastallat - To Have a Campfire, 2016)
Marja Helandera oanehisfilbma "Dolastallat" lea mielde Mediataide kasvattaa -siidduin oahpahusgeavahusas. Filmma bokte beassá jurddašit ovdamearkka dihte luonddu ja birrasa. Govva: Marja Helander (Dolastallat - To Have a Campfire, 2016)

Neahttabálvalus fállá skuvlalaččaide dáidda- ja mediabajásgeassima suomagiela lassin maid golmma sámegillii ja ávkkástallá sámedáidagiin.

Bálvalusa bajásdoalli lea suopmelaš mediadáidaga guovddáš AV-arkki. Bálvalusas leat Suomas bargi njunušdáiddáriid duojit ja daidda plánejuvvon oahppamateriálat, mat heivejit oassin oahpahusa.

– Dál sámenuorat ja -mánát besset iežaset eatnigillii oahpásmuvvat mediadáidagii, dadjá buvttadeaddji Helka Heinonen.

Marja Helandera duodji bidjá jurddašit luonddu ja birrasa

Helka Heinonen lea ilus, go materiála lea fállun maid golmma sámegillii. Su mielde prošeavtta bokte beassá álkit oahpásmuvvat vuos mediadáidagii ja dan dulkomii.

– Min ulbmilin lea buoridit vejolašvuođaid joksat mediadáidaga ja buktit dan eambbo oidnosii.

Mediataide kasvattaa, Marja Helander
Helandera oanehisfilbma muitala sámenissonis, geas lea modeardna dolastallanboddu Guoládatnjárgga duoddariin. Helander neaktá ieš filmmažis. Govva: Marja Helander (Dolastallat - To Have a Campfire, 2016)

Heinonen čilge, ahte lea oalle váttis meroštallat dan, mii buot lea mediadáidda. Nu nuoraid TikTok-filmmažat go dáiddačájáhusaid duojit soitet dulkojuvvot mediadáiddan. Muhtumin maiddái dábálaš govaid ja ealligovaid sáhttá atnit mediadáiddan.

Sámedáiddár Marja Helandera filbmaduodji Dolastallat lea maid oassin oahppamateriálapakeahta. "Dutkka iežat birrasa. Gokko luondu ja olbmo huksen biras deaivvadit?", jerrojuvvo filbmaduoji bargobihtáin.

Fálaldat heive Sápmái, gos eai leat olu mediadáiddasajit

Bálvalusa sámegielat materiálain beassá eandalitge oahpásmuvvat mediadáidagii ja dasa, maid dat sáhttá sisttisdoallat. Oahppomateriálat leat neahta bokte nuvttá buohkaid oažžumis.

– Háliidit maid oažžut mediadáiddabajásgeassima dakkár báikkiide, gos ii vealttakeahttá beasa nu álkit vaikkoba museaide fitnat, muitala buvttadeaddji Helka Heinonen.

Sisdoallu heive máŋgga ahkásaš mánáide. Oahpaheaddji sáhttá Heinonen mielde álkit heivehallat bargobihtáid iežas oahppiide heivvolažžan.

Mediadáidda sámegillii -oahpahuspakeahtta lea buvttaduvvon ovttasbarggus Sámedikkiin. Pakeahtas leat guhtta mediadáiddaduoji ja daidda gullevaš hárjehusat.

Varrasamosat: Sápmi

Váldoođđasat

Varrasamosat

Muualla Yle.fi:ssä