Sápmi |

Skuvlalaččat álggahit skuvla sadjásaš skuvlasajiin Ohcejogas ja Anáris – "Oassi lea eváhkus já oassi lea skuvllas"

Sisáibmováttisvuođaid dihte skuvlalaččat fertejit vázzit skuvlla sadjásaš skuvlasajiin. Sihke Anára ja Ohcejoga gieldda skuvllain leat leamašan váttisvuođat.

Inarin monitoimitalo
Anáris leat mearridan álggahit plánenbargguid ođđa skuvla várás. Govva: Vesa Toppari / Yle

Mannan giđa Anára skuvla sámeluohkká váccii skuvlla olgun. Oahpaheaddjit ledje ilus das, muhto gos ohppiid skuvlabálggis álgá dán čavčča?

Anára gieldda čuvgehushoavda Ilkka Korhonen muitala, ahte dán jagi Avvilis ja Anáris álggahit skuvlla sadjásaš skuvlasajiin. Avvilis lea jo skuvlla plánenbargu jođus ja ođđa skuvlaguovddáš galggašii gárvánit Avvilii jagis 2022.

– Anáris leat vel álgomuttus. Mii leat mearridan álggahit plánenbargguid, ja vuođđodieđuid čoaggin lea jođus. Anáris joatkit sihke skuvlasajiin ja Sajosa láigosajiin. Dán jagi galggaše boahtit eanet sajit ja dasto luohpat Sajosa sajiin, muitala Korhonen.

Avvila boares skuvlla livčče galgan burgit geasi áigge. Korhonen goittotge muitala, ahte dat livččii dolvon nu olu áiggi, ahte skuvla lea vel ceaggut. Geasi áigge leat goittotge boahtán maiddái ođđa sajit.

– Geasi áigge leat boahtán beaiveruokto- já skuvlasajit lasi, ja oassi ohppiin fárre dohko ođđa sajiide. Badjedási oasil joatkit seammá sajiin go dan rádjái, son muitala.

Ohcejoga gielddas huksenbarggut jođus

Ohcejoga gieldda čuvgehushoavda Laura Arola muitala, ahte sihke Ohcejohnjálmmis ja Gáregasnjárggas oassi skuvllain lea anus.

– Mis lea anus dat oassi skuvllas, mas minerálaullu árvvut eai maná badjel dan ráji. Buot dáidda ohppiide ja bargiide geaidda leat boahtán symptomat, de daidda lea ordnejuvvon sierra báiki. Mii leat čoavdán ášši nu, ahte mis lea boares Áilegasdállu ja dasto mis leat gieldda láigovisttit, muitala Arola Ohcejohnjálmmi dilis.

– Gáregasnjárggas leat dahkkon mihtideamit dál guktii geasset. Mii sáhttit nuppi beali skuvllas geavahit. Oassi lea eváhkus já oassi lea skuvllas, muitala Arola.

Ohcejogas huksen barggut leat jođus.
Ohcejogas leat huksenbarggut jođus. Govva: Vesa Toppari / Yle

Ohcejoga gielddas ođđa skuvllaid plánen- ja huksenbarggut leat buorre muttus. Arola muitala, ahte logahaga ásodat galggašii leat gárvvis dán jagi loahpas, Ohcejohnjálmmi ođđa skuvla suoidnemánu 2020 loahpas ja Gáregasnjárggas ođđa skuvla fas borgemánus 2020.

Varrasamosat: Sápmi

Váldoođđasat

Varrasamosat

Muualla Yle.fi:ssä