Sápmi |

Skuvllat álget dál eanaš guovlluin Sámis – Čeavetjávrris seamma ráddjehusaiguin go giđđat, Heahtás eai luoitte olggobeale olbmuid sisa

Heahtá vuođđoskuvlla ja Eanodaga duottarlogahaga veahkkehoavda Hellin Pietikäinen ja Čeavetjávrri skuvlla rektor Johanna Nieminen vuordiba skuvllaid álgima iluin ja gealdagasain.

Sevettijärven koulun koltansaamen luokassa työstetään omaa lehteä.
Skuvllat álget lagašoahpahussan, muhto hygieniijai ja dorvvolašvuhtii giddejit earenoamáš fuomášumi. Arkiivagovva Čeavetjávrri skuvllas. Govva: Sara Wesslin / Yle

Odne gaskavahku 12.8. skuvlabargu álgá vuođđoskuvllain ja logahagain Anáris, Eanodagas ja Soađegilis. Ohcejoga gielda álggaha skuvlajagi sámeguovllu gielddain maŋimužžan, boahtte vahku duorastaga 20.8.

Oahpahus álgá lagašoahpahussan, muhto skuvllain čuvvot čavgejuvvon hygieniija- ja dorvvolašvuođarávvagiid.

Skuvllaid álgima vurdet iluin ja gealdagasain

Heahtá vuođđoskuvlla ja Eanodaga duottarlogahaga veahkkehoavda Hellin Pietikäinen muitala, ahte sus lea stuorra mokta álgit fas bargui.

– Leat leamašan measta vihtta mánu, ahte eat leat oaidnán buot oahppiid ovttas. Mu mielas lea gal somá álgit fas. Dieđusge lea gelddolaš dan koronadili ektui, muhto ilus mun gal lean.

Kooronadilli váldojuvvo dieđusge vuhtii oahpahusas.

– Váldit hui bures vuhtii dan hygieniija ja mii leat iskan ordnet, ahte eat čohkká aivve bálddalagaid. Mii eat luoitte olggobeale olbmuid skuvlii sisa, mii iskat diená eastadit, ahte ii boađášii dat dávda min skuvlii, čilge Pietikäinen Heahtá skuvlla ordnestallamiid.

Hellin Pietikäinen
Heahtá vuođđoskuvlla ja Eanodaga duottarlogahaga veahkkehoavda Hellin Pietikäinen álggaha movttegis mielain fas barggus. Govva: Anni-Saara Paltto / Yle

Pietikäinen muitala, ahte Eanodagas lea gal gearggusvuohta sirdásit gáiddusoahpahussii, jos dakkár dilli boahtá.

– Min gielda lea fidnen lasi dihtoriid ja min oahpaheaddjit fidnejit dál áibbas fargga dasa skuvlejumi. Mii leat gergosat mannat gáiddusoahpahussii jos nie dáhpáhuvvá. Dieđusge mii sávvat, ahte dasa ii leat dárbu.

Guldal dás Hellin Pietikäinen jearahallama. Son muitalii 11.8. earet eará das, makkár movttain álgá fas skuvlabargui. Jietna: Tuomo Laiti / Yle

Čeavetjávrris orru jo nuorvoáigodat jođus

Maiddái Čeavetjávrri skuvlla rektor Johanna Nieminen vuordá skuvllaid álgima ilolaš, muhto nuppe dáfus gelddolaš mielain.

– Lea somá deaivat oahppiid ja lea leamaš somá dás jo kollegaiguin moadde beaivve bargat. Nuppe dáfus lea vehá gelddolaš, mo dainna koronain eallit. Ja orru leamen, ahte dál lea jo muhtin nuorvoáigodat dáppe jođus.

Čeavetjávrris skuvla álgá seamma ráddjehusaiguin go skuvla miessemánus nogaige, muitala Nieminen. Čeavetjávrrisge giddejit fuomášumi dorvogaskkaide ja hygieniijai, eaige galledeamit leat vel skuvlla álggus vejolaččat.

– Dárkkuhus livččii, ahte dan guovtti vahku áigge oaidnit makkár dat dilli lea, ja dasto sáhttit smiehttat fas ođđasit, sáhttitgo ráddjehusain veháš luohpat vai galgágo daid juobe čavget, dadjá Nieminen.

Guldal dás Čeavetjávrri skuvlla rektor Johanna Nieminen jearahallama. Erkki Gauriloff jearahalai su disdaga 11.8. Jearahallan lea suomagillii. Jietna: Erkki Gauriloff / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä