Sápmi |

Sky News finai Lujávrris jearahallamin Valentina Sovkina

Stuorrabritánnialaš kanála Sky News lea fitnan Lujávrris dahkamin videoreportaša Ruošša sámiid birra. Sky News lea jearahallan earet eará Guoládaga sámi parlameantta ságadoalli Valentina Sovkina ja boazosápmelaš Svetlana Matrehina.

Sky News ođas Lujávrris, Ruošša Sámis.
Sky News -kanála ođđasat Lujávrris 2.11.2014. Govva: Sky News

Stuorrabritánnialaš kanála Sky News lea fitnan Lujávrris dahkamin videoreportaša Ruošša sámiid birra.

Sky News -kanála ođas Moskova oaguha Ruošša eamiálbmoga (Indigenous Russians harassed by Moscow) almmustuvai sotnabeaivve.

Sky News lea jearahallan ođđasii earet eará Guoládaga sámi parlameantta ságadoalli Valentina Sovkina, gii muitala mo sutnje geavai, go son lei mátkkis ON eamiálbmogiid máilmmikonferánsii New Yorkii čakčat.

Stáhta gáibida veahkkeruđa ruovttoluotta boazosápmelaččas

Lassin Sky News lea galledan boazosápmelaš Svetlana Matrehina luhte.

Matrehina jáhkii, ahte Ruošša stáhta lei addán sutnje veahkkeruđa turistaboazogiláža huksema várás. Dál stáhta lea goittotge gáibideamen ruđaid ruovttoluotta.

– Jos mu stáhta, man mun atnen ovdal árvvus, láhtte muinna ná, nu mo mun sáhtán leat patriohta dán maŋŋá?, Matrehina jearrá.

Sky News ii lean ožžon vástádusaid sámiid áššiide Ruošša eiseváldiin.

"Olbmot eai moaitte Putina kamera ovddas"

Sky News dagai seamma mátkkis maid gallupa das, maid álbmot jurddaša Ruošša presideanta Vladimir Putinis.

– Olbmot rápmojit presideantta. Oktage ii hálit kritiseret su kamera ovddas. Ealáhatolbmot geaid leat deaivan muitalit, ahte sii illá birgejit sin ealáhatruđain, muhto sii eai sivat Putina sin váttisvuođain. Daidda gávdno álo muhtin eará sivalaš, dego báikkálaš ráđđehus, Sky News -kanála reportar Katie Stallard muitala videos.

Varrasamosat: Sápmi

Váldoođđasat

Varrasamosat

Muualla Yle.fi:ssä