Sápmi |

SlinCraze lea dán jagáš Áillohaš-bálkkašumi vuoiti

Odne juhkkojuvvui Áillohaš-bálkkašupmi KulturSápmi-doaluid oktavuođas.

Ijahis idja
SlinCraze lea dán jagáš Áillohaš-bálkkašumi vuoiti. Govva: Ville-Riiko Fofonoff / Yle

Odne lea juhkkojuvvon Áillohaš-bálkkašupmi sámi rap-artista SlinCrazei nappo Nils Rune Utsii.

Bálkkašupmi juhkkojuvvui Sámiráđi, Norgga Sámedikki ja Innovašuvdna Norgga oktasaš digitála KulturSápmi-konferánssas. Áillohaš-bálkkašumi geigiiga Ol Johan Gaup ja Klemet Erland Hætta Guovdageainnu sámesearvvi ja Guovdageainnu gieldda ovddas.

Ággan vuoitui lea, ahte SlinCraze lea bargguinis ođasmahttán sámegiela geavaheami musihkas. Son lea bargan musihkain badjel 15 jagi ja čuojahan earret eará Norgga gonagassii. Ákkaid vuođul son lea erenoamáš buorre teakstačálli ja son lea okta dehálamos artisttain sámi rap-šáŋŋeris.

– Mu nagodedje dájuhit mielde deike čuojahit artistan, muitala SlinCraze.

SlinCraze čuojaha maid konseartta KulturSámi oktavuođas.

Bálkkašupmin SlinCraze vuittii diploma, 20 000 Norgga ruvnnu ja guovtte vahku galledeami Áillohaš-rohki Lásságámmis, Gáivuonas.

Áillohaš-bálkkašupmi lea árbevirolaččat juhkkojuvvon beassážiid áigge Sámi Grand Prix -musihkkadáhpáhusas Guovdageainnus. Koronadili dihte doaluid eai sáhttán ordnet dalle.

Áillohaš-bálkkašupmi lea sámemusihka bálkkašupmi, maid Norgga Sámiid Riikkasearvi, Guovdageainnu gielda ja Guovdageainnu Sámiid searvi leat vuođđudan jagis 1993 Áillohačča 50. riegádanbeaivvi gudnin.

KulturSápmi lea jahkásaš gávnnadanbáiki Sámi dáidda- ja kultursuorggi olbmuide Sámis, ja dat lágiduvvui vuosttáš háve Gironis diibmá 2019. Koronapandemiija geažil dán jagáš KulturSápmi lágiduvvo digitála hámis.

Varrasamosat: Sápmi

Váldoođđasat

Varrasamosat

Muualla Yle.fi:ssä