Sápmi |

Soađegili modulaskuvlla hálidit sirdit Vuhččui čuovvovaš lohkanbadjái

Vuohču skuvllas leat gillán sisáibmováttisvuođaid dihte. Soađegili gielddahoavda evttoha modulaskuvlla sirdima Vuohču skuvlla šilljui ja dálá skuvlavistti burgima muhtin osiin.

Vuohču skuvla
Vuohču skuvllas leat gávnnahan sisáibmováttisvuođaid. Govva: Maiju Saijets / Yle

Soađegili gielddahoavda Petri Härkönen evttoha, ahte Soađegili Tähtikunta-skuvlla geavahusas leamašan modulaskuvlla sirdet lohkanbaji 2021–2022 maŋŋel Vuohču skuvlla šilljui. Vuohču skuvllas leat leamašan sisáibmováttisvuođat jagiin 2019–2021.

Dáinnalágiin hálidit dáhkidit dearvvaslaš, dorvvolaš ja doaibmi oahpahus- ja árrabajásgeassindoaibmasajiid Vuohču skuvllalaččaide ja bargiide. Soađegili gielda oamasta modulaskuvlavistti ja dat lea leamaš Soađegili márkanis Tähtikunta-skuvlla vistin.

Vuohču skuvllavisti evttohuvvo burginlahkái

Soađegili gielddaráđđehus gieđahalai Vuohču skuvlla boahttevuođa čoahkkimisttis 22. skábmamánu. Gielddaráđđehus mearridii bivdit čuvgehuslávdegotti cealkámuša áššái. Dan maŋŋá áššis dahkkon huksenfidnu gieđahallet fas gielddaráđđehusas.

Modulaskuvlavistti sirdima lassin gielddahoavda evttoha, ahte Vuohču dálá skuvlavisttis burget muhtin osiid dahje oalát, vai modulaskuvlla sáhtášii laktit skuvlla lihkadansále oktavuhtii. Burginbargguid áigetávval mearriduvvo maŋŋeleappos.

Soađegili gielda ordne ságastallandilálašvuođa Vuohču skuvllas duorastaga 25. skábmamánu diibmu 18. Dilálašvuhtii oassálastá Soađegili čuvgehushoavda Jouni Oikarinen.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä