Sápmi |

Soađegilis rádárskuvlejupmi, mii laktasa Gárasavvona EISCAT 3D -rádárii

Soađegilis lea dán vahkus álbmogiidgaskasaš rádárskuvlejupmi. Skuvlejumi ordnen Soađegilis laktasa dasa, go Norgii, Supmii ja Ruŧŧii leat huksemin máilmmi eanemus modearna rádára EISCAT 3D.

EISCAT 3D prošeakta
Govva: NIPR

Oulu universitehta Soađegili geofysihka observatoriija lágida álbmogiidgaskasaš rádárskuvlejumi Soađegilis. Rádáriin dutket eatnama bajitáibmogearddi ja lagasgomuvuođa.

Skuvlejupmái oassálastet 42 studeantta. Skuvlejumis logaldallet ollásii 16 logaldalli, geat bohtet viđas sierra riikkas. Studeanttat besset maŋŋebárgga 26.7. geahččalit EISCAT-rádáriid gáidosis ovdamearkan Norgga Romssas.

Skuvlejumi ordnen Soađegilis laktasa dasa, go Norgii, Supmii ja Ruŧŧii leat huksemin máilmmi eanemus modearna rádára EISCAT 3D. Suoma rádár boađašii Gárasavvonii, muhto báiki ii leat vel válljejuvvon.

EISCAT 3D máksá 75 miljon euro

Olles EISCAT 3D árvalit máksit 75 miljon euro. Suoma ossodat prošeavtta ruhtadeamis lea 12,8 miljon euro, Ruoŧa ossodat 120 miljon Ruoŧa ruvnnu ja Norgga 220 miljon Norgga ruvnnu.

Rádárskuvlejumi ruhtadit Gironis leahkki Scientific Association ja Amerihká ovttastuvvan stáhtaid National Science Foundation (NSF). Soađegili ovttasbargoguoibmin ordnedeamiin lea kalifornialaš dutkanlágádus SRI International. Vuosttaš álbmogiidgaskasaš EISCAT ja NSF oktasaš rádárskuvlejumit dollojuvvojedje Grönlánddas ja Puerto Ricossa jagiid 2011 ja 2014.

Rádárskuvlejumi ordnen lea ovttasbargu maiddái Oulu universitehta, Lappi ámmátoahpahaga, Roavvenjárgga skuvlengieldaovttastumi ja Soađegili gieldda gaskkas. Logaldallamiid doallat sihke Sompio skuvlla Paarma sáles ja Tähteläs, Oulu universitehta Soađegili geofysihka observatorios.

Varrasamosat: Sápmi

Váldoođđasat

Varrasamosat

Muualla Yle.fi:ssä