Sápmi |

Soađegillilaš fitnodatdoalli áššáskuhtton luonddu nuoskkideamis – iešguđetlágan bázahusat boldojuvvon ja hávdáduvvon eatnamii

Fitnodatdoalli mieđiha luonddu nuoskkideami, muhto gáibida, ahte sivahus garra luonddu nuoskkideamis hilgojuvvo.

Jussi Eiramo fitná juohke vahkus Ohcejogas huksenbargguid dihte. Váldodálu Pisara vuođđu leikejuvvui suoidnemánus.
Juhani Eiramo lea hukseheamen Ohcejohkii hotealla Arctic Resort Utsjoki. Govva: Outi Paadar /Yle

Soađegillilaš fitnodatdoalli Juhani Eiramo lea áššáskuhtton luonddu nuoskkideamis. Áššáskuhtti mielde Eiramo jođihan fitnodat, Kakslauttanen Arctic Resort Oy huksen-, burgin- ja divodanbázahusaid leat boaldán, roggan eatnama vuollái dahje muđui hilgon lundui.

Áššáskuhtti árvala, ahte bázahusaid leat boaldán unnimusat 200 tonna ovddas. Eatnamii roggojuvvon dahje muđui hilgojuvvon bázahusaid árvalit leat oktiibuot 500 tonna. Bázahusain ledje earret eará betoŋŋa, tiilageađggit, spellet ja seahkalas huksenbázahusat.

Áššáskuhtti oaidná maid, ahte fitnodatdoalli mihttun lei leamašan garvit fitnodatdoibmii gullevaš goluid ja oažžut logiid duháhiid euroid ovddas ekonomalaš ávkki.

Eiramo mieđiha luonddu nuoskkideami, muhto gáibida, ahte sivahus garra luonddu nuoskkideamis hilgojuvvo. Eiramo muitala iežas fállan bázahusaid Lappi bázahusdikšunfitnodat Lapeco vuostáiváldinguovddážii, gos son oaččui dieđu, ahte bázahusaid galgá doalvut eará sadjái. Soađegili vuostáiváldinguovddáš maid biehttalii vuostáiváldimis bázahusaid.

Eiramo mielde vuoiggalaš ráŋggáštus luonddu nuoskkideamis lea 50 beaivvi sáhkku. Eiramo vástádus bođii ovdan láhkačeahpi ráhkadan girjjálaš vástádusas, mii doaimmahuvvui gearretriektái.

Áššáskuhtti gáibida evttolaš fáŋgalduomu ja sáhkuid logiid duháhiid euroid ovddas

Áššáskuhtti mielde Eiramo jotkkii doaimmaidis virgeoapmahaččaid váruhusain fuolakeahttá. Eahpiduvvon rihkkosat dáhpáhuvve Soađegilis gaskal jagiid 2013–2018.

Dan lassin fitnodatdoalli sivahit hálddašeami loavkadeamis dasgo su doaimmat ledje áššáskuhtti mielde vahágahttán Suoma stáhta eaiggádan ja Meahciráđđehusa hálddašan guovllu. Eiramo fitnodat lea guovllus láigolažžan.

Áššáskuhtti gáibida Eiramoi unnimusat jagi evttolaš duomu ja unnimusat 90 beaivvi sáhku vel lassin. Lassin gáibidit fitnodatdoalli ja su fitnodagaid máksit stáhtii 50 000 euro rihkkosa dagahan ovdduin ja fitnodagas gáibidit vel 60 000 euro servodatsáhku.

Ášši gieđahallan álggii Lappi gearretrievttis Soađegilis ikte maŋŋebárgga. Váldogieđahallamii leat várrejuvvon golbma beaivvi. Duopmu celkojuvvo maŋŋá.

Doaibmá sihke Soađegilis ja Ohcejogas

Juhani Eiramo lea okta Lappi riikkaidgaskasaš mátkeealáhusa ovdavázziin ja son lea leamašan suorggis badjel 40 jagi Soađegili Kakslauttasis. Fitnodat bálvala olgoriikalaš turisttaid ja lea dovddus otná beaivve erenoamážit muohtaigluin. Eiramo válljejuvvui jagi fitnodatdoallin Lappis čakčamánus.

Kakslauttanen lassin Eiramo oamasta Ohcejogas eatnamiid, gosa son lea hukseheamen hotealla, lássaigluid ja hirsastobuid 11,5 miljon euro ovddas. Báikki namma lea Arctic Resort Utsjoki. Hotealla galggašii gárvánit boahtte jagi guovvamánus

Yle ii fáhten Eiramo ságaide kommenteret ášši.

Varrasamosat: Sápmi

Váldoođđasat

Varrasamosat

Muualla Yle.fi:ssä