Sápmi |

SOG viiddidanoasi huksen lea ollen beallemuddui  –  Veahčira beaškkas joatkašuvvá vel ođđajagimánu rádjái 

Sámi oahpahusguovddáža viiddidanoassi gálggašii válbmanit ođđajagimánus. Rektor lea hui duđavaš go sii ožžot lasi linnjáid Anárii.

Saamelaisalueen koulutuskeskuksen rehtori Liisa Holmberg
Govva: Yle / Anneli Lappalainen

Sámi oahpahusguovddáš SOG lea Suoma áidna sápmelaš oahppolágádus. Skuvllas lea leamašan juo máŋga jagi dárbu oažžut ođđa lanjaid. Dál Sámi oahpahusguovddáš lea beassamin áššiin ovddos guvlui go viiddidanoasi leat ožžon gáhtu vuollái.

Viiddidanoasi huksen lea dál beallemuttus ja sullii 1 000 njealjehasmehtera lanjat galggašedje leat  gárvát ođđajagimánus. Sámi oahpahusguovddáža rektor illuda huksema ovdáneami.   

– Lean gal duđavaš dasa. Lea máilmmi fiinna ášši, ahte mii oaččuimet dákkár dálu deike ja dan huksen lea ovdánan áigedávvalis, Liisa Holmberg mojohallá.

Boahtte čavčča oahppit šuvihit ođđa lanjaide

Juovlamánus 2016 Sámi oahpahusguovddáža viiddidanoassi  lei easkka báhpára alde plánan.  Viiddidanoassi galggašii válbmanit ođđajagimánus, dan maŋŋá lanjaide  ordnegohtet viessogálvvuid ja čakčat 2018 lanjat galggašedje leat oahppolágádusa  geavahusas. Sámi oahpahusguovddáža rektor Liisa Holmberg mielas lea buorre, go leat ožžon lasi oahppolinnjáid Anárii.  

– Merkononat, datanomat, goahkat ja lagašdivššárat bohtet dán vissui. Dalle mis leat dáppe turismasuorggi ja duodjelinjá dáppe Anára doaibmabáikkis. Media ja giellaoahput leat Sajosis ja luondduealáhusat ja boazodoalu skuvlejupmi Doaivunjárggas. Nappo dál leat oahppolinnját čoahkis dán geahčen Anára gieldda.    

Sámi oahpahusguovddáža viiddidanoasi hukse Senaatti-kiinteistöt, mii lea stáhta giddodatlágádus. Sámi oahpahusguovddáš lea lágádusa láigolažžan.

Stáhta giddodatlágádusa Senaatti huksehanhoavda Pasi Petäjäjärvi mielas lea buorre, go Sámis ovddidit ealáhusdoaimmaid

– Su mielas huksendoaimmat leat buorrin nu Senaatti-lágádussii go báikki olbmuide, ealáhusdoaimmat ovddiduvvojit maid stáhta ruđaiguin, ná son oaidná dán ášši, čilge Petäjäjärvi.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä