Sápmi |

Sohkaršohka válgavideoráidu almmustahtto otne – válgavideoin mielde 23 evttohasa

Sohkaršohka diehtogilvu -válgavideoráiddus sámediggeválgaevttohasat besset čájehit, man bures sii dovdet sámenuoraid jurddašeami.

Sohkaršohka válgavideoráidu
Govas gurotbealde Ida-Maria Helander, Pirita Näkkäläjärvi, Anne Nuorgam, Anni Koivisto ja Hanna Guttorm. Ovddas leaba Janne Hirvasvuopio ja Kaisa-Mari Jama. Govva: Ville-Riiko Fofonoff / Yle

Yle Sámi nuoraidprográmma Sohkaršohkka almmustahttá duorastaga válgavideoráiddu Youtubes ja Yle Areenas diibmu 12:00. Videot almmustahttojuvvojit Yle Sámi Instagram-konttus beaivvi mielde. Videoráiddu lea buvttadan Xia Torikka. Videoráidu lea dahkkon ovttasbarggus Sámedikki nuoraidráđi, Suoma Sámi nuorat -searvvi sihke sámegiela studeantaiguin Oulu universitehta Giellagas-instituhtas ja Avvila logahagas.

Sohkaršohka válgavideoráidu
Govas gurotbealde Veikko Feodoroff, Leo Aikio, Anu Avaskari, Marko Tervaniemi, Kirsti Kustula ja Tauno Ljetoff. Ovddas leaba Niina Siltala ja Neeta Jääskö. Govva: Ville-Riiko Fofonoff / Yle

Videoráidu ii leat árbevirolaš válgavideolágan baicce diehtogilvu. Diehtogilvvu jurddan lea testet, man bures sámediggeválgaevttohasat dovdet sámenuoraid jurddašeami, ja man bures sii máhttet jurddašit nuoraid geahččanguovllus.

– Mis leat čuoččuhusat, maidda leat ožžon vástádusaid sámenuorain. Evttohasaid bargun lea smiehttat maid nuorat leat vástidan. Dat ii leange gusto nu álki, go sáhtášii jurddašit, muitala Torikka.

Ulbmilin juksat nuoramus jienasteaddjiid

Válgavideoráiddu buvttadeaddji Xia Torikka mielde válgavideot leat dárkkuhuvvon namalassii nuoramus jienasteaddjiide. Diehtu sámediggeválggain ii juksan buot nuoraid, ja dan dihte lei dehálaš oažžut válgafálaldaga nuoraide.

– Lea leamaš sáhka dan birra, go nuorat eai leat diehtán válggaid birra maidege eaige muhtumat oba berošge. Mii leat geahččalan dál ođđa lahkonanvuogi, mii leat guođđán garra politihkema ja válgasságaid eret, ja geahččalat baicce persovnnaid bokte lahkonit nuoraid.

– Jáhkán válgaevttohasat besset lagabui nuoraid ná, smiehtada Torikka.

Sohkaršohka válgavideoráidu
Govas leat gurotbealde Teija Linnanmäki, Irja Seurujärvi-Kari, Ulla Magga, Tuomas Aslak Juuso, Sámmol Lukkari, Magreta Sara, Asko Länsman ja Pigga Keskitalo. Govva: Ville-Riiko Fofonoff / Yle

Videot leat anáraš-, davvisáme-, nuortalaš- ja suomagillii. Válgavideoráidui oassálaste Anne Nuorgam, Anni Koivisto, Anu Avaskari, Asko Länsman, Hanna Guttorm, Ida-Maria Helander, Irja Seurujärvi-Kari, Janne Hirvasvuopio, Kaisa-Mari Jama, Kirsti Kustula, Leo Aikio, Magreta Sara, Marko Tervaniemi, Neeta Jääskö, Niina Siltala, Pigga Keskitalo, Pirita Näkkäläjärvi, Sámmol Lukkari, Tauno Ljetoff, Teija Linnanmäki, Tuomas Aslak Juuso, Ulla Magga ja Veikko Feodoroff.

Válgavideoid lea čuohppan ja editeren Ville-Riiko Fofonoff.

Varrasamosat: Sápmi

Váldoođđasat

Varrasamosat

Muualla Yle.fi:ssä