Sápmi |

Sohkaršohkka: Fred René Buljo muitala Keiino skearru bihtáid birra

Dán vahku Sohkaršohkas lei guossin earret eará Fred René Buljo.

Fred René Buljo
Fred René Buljo lea šaddan dovddusin ráppárin. Govva: EBU / Andres Putting

Keiino-joavku almmustahtii debyhtaskearrus mannán vahkus. Keiino ovttastahttá eamiálbmotmusihkka pop-musihkain.

Joavkku lahtu Fred René Buljo muitala, ahte eará eamiálbmotmusihkkáriin barggadettiin studios vuhttui ráhkisvuohta. Su mielas lea erenomáš dehálaš čájehit olles máilbmái, ahte eamiálbmogiid kultuvrrat ja gielat leat relevánttat ja cool.

Buljo muitalii dán vahkku Sohkaršohkka-sáddagis muhtin bihtáid duogážiid birra.

Roar like a lion -bihtá lea ráhkaduvvon ovttasbarggus maorimusihkkajoavku Te Hau Tawhitiin. Dát bihtá galgá leat nu gohčoduvvon power anthem -lávlla buot eamiálbmogiidda. Dát muitala, das ahte maiddái eamiálbmogat galget gullot.

–Ahte galgá guldalit daid min máttuid čehppodaga sihke luonddus ja mot galgá eallit. Mun dajan dan lávlagis, ahte guoran su máttuid, sii čurvot mu nama dál, čilge Buljo.

Skearru vuosttas bihtá Take me home lea sutnje erenomáš dehálaš.

– Beasan mu ruohtasiidda sámi ráppái, mun sihke lávllun ja ráppen. Mii čáliimet dan lávlaga diibmá go leimmet olu turneain, áidna maid mii háliideimmet lei vuolgit ruoktot. Áibbašin ruoktot Guovdageidnui.

Dán vahku sáddagis lea sáhka boahttevuođa nieguin ja plánain. Dasa lassin sáddagis gullat maiddái Niillas Holmberg ođđa Guorga-joavkku birra. Guorga almmustahttii vuosttas bihtás Duoddara modjegobit bearjadaga. Bihtás lea ráhkaduvvon maiddái musihkkavideo, man lea bagadan Katja Gauriloff.

Sohkaršohkka lea nuorra rávesolbmuid rádioprográmma, mii sáddejuvvo Yle Sámi rádios juohke duorastaga dii. 17.30–20.00 ja nuppádassii seamma áigge bearjadaga. Sáddagat gávdnojit maiddái Yle Areenas. Sátta gullo Norgga bealde NRK Sámi rádios juohke bearjadaga dii. 19.30–22.00. Sohkaršohka sáhttá čuovvut Instagramas @ylesohkarsohkka.

Varrasamosat: Sápmi

Váldoođđasat

Varrasamosat

Muualla Yle.fi:ssä