Sápmi

Sohkaršohkka joatkašuvvá ođđa hámis: vuosttas sketsa čalmmustahttá giellavahku

Sohkaršohkka 2020
Sohkaršohkain barget Ida Grønmo, Xia Torikka, Britt-Inger Ruotsala ja Sáárákáisá Seurujärvi. Govva: Tomi Lampinen / Yle

Sohkaršohkka buvttada dál sosiála media sisdoaluid.

Yle Sámi nuoraidprográmma Sohkaršohkka joatkašuvvá fas ođasmahttojuvvon hámis. Sohkaršohkain barget Britt-Inger Ruotsala, Ida Grønmo sihke mannan bajis oahpes Sáárákáisá Seurujärvi ja Xia Torikka.

Ođđa Sohkaršohkka buvttaduvvo ovttasbarggus Yle Kioskiin.

Sohkaršohkka ii šat gullo rádios, baicce dat lea oalát sirdásan sosiála mediai ja buvttada sisdoalu iešguđet somelávddiide dego Instagramii ja TikTokii. Ulbmilin lea dahkat dakkár sisdoalu, mii gieđahallá daid áššiid, mat leat nuoraid eallimis áigeguovdilat ja dan bokte addit veardásašdoarjaga.

– Dasa lassin háliidat gieđahallat nu sámeáššiid go maiddái fenomenaid ja eará stuorra áššiid, mat ságastahttet nuoraid miehtá máilmmi, muitala Britt-Inger Ruotsala.

Sohkaršohkka almmustahtii vuosttas TikTok-video gaskavahku. Dan videos nieiddat čájehit, mo sii čiŋadit gávttiin iešguđetlágan dilálašvuođaide.

– Mii čuovvut TikTok-treanddaid ja geahččalat smiehttat, sáhtášiigo muhtin treanddas bargat sámeveršuvnna dahje gávdnogo dan áššái sámi geahččanguovlu, muitala Xia Torikka.

Xia Torikka ja Britt-Inger Ruotsala
Xia Torikka ja Britt-Inger Ruotsala illudeaba beassat bargat sosiála mediain. Govva: Tomi Lampinen / Yle

Sohkaršohka sisdoalut almmustuvvet maiddái Instagramas juohke vahku maŋŋebárgga ja duorastaga. Vuosttas sketsa almmustahttojuvvui otne. Sketsa fáddán lea sámegiella ja suopmanerohusat.

– Háliideimmet álggahit dakkár videoin, go dál lea maid giellavahku, muitala Ruotsala.

"Sohkašohka rádioprográmma eai guldalan nuorat, baicce sin váhnemat"

Xia Torikka ja Sáárákáisá Seurujärvi leaba álgojagis 2020 jearahallan sámenuoraid sin mediageavahanvieruin. Jearahallamiin bođii ovdan, ahte rádio ii leat dat media, mii gullá nuoraid beaivválaš eallimii.

– Jearahalaime njeallje sámenuora vuđolaččat ja de gulaskuttaime iežame skihpáriin sin jurdagiid Sohkaršohka ja mediageavaheami birra. Máŋgasiin sis lohke, ahte sii eai guldal Sohkaršohka, baicce sin váhnemat guldalit, muitala Torikka.

Danin Sohkaršohkka leage mearridan sirdásit ollásit sosiála mediai.

– Rádioprográmma ráhkadeapmi leamaš issoras somá ja veháš ahkit luohpat das, muhto áiggit rivdet ja mii fertet čuovvut nuoraid dohko, gos sii leat, lohká Xia Torikka.

Varrasamosat

Muualla Yle.fi:ssä