Sápmi |

Sohkaršohkka: Vuosttas geardi Tinderis buvttii vuorddekeahtes vásáhusa 

Mo geavvá geasserománssaide spiehkastatdilis? Sohkaršohkas lea dán vahkus sáhka ráhkisvuođa birra.

Áile-Risten Holmberg
Áile-Risten Holmberg lea dán vahku mielde Sohkaršohkas ságastallamin ráhkisvuođa birra. Govva: Hildá Länsman

Miiba livčče geassi unna geasserománssa haga, muhto dán gease guoimmi ohcama váttásmahttá koronavirus. Buot festiválat ja stuorát doalut leat šluhttejuvvon, ja stuorámus oassi Sohkaršohka guldaleaddjiin oaivvildedje Instagram-gažadeamis, ahte buoremus vuohki gávnnadit livčče albma eallimis.

Ohcejohkalaš Áile-Risten Holmberg ii dieđe maid vuordit dán gease. Son liiko oahpásmuvvat ođđa olbmuiguin, muhto dán vuoro ii vealttekeahttá beasage deaivat ođđa olbmuid.

– Dieđusge sáhttá háleštit juohkehaččain gii boahtá ovddal, muhto eará ášši leago ieš beroštuvvan dain dahje leatgo dat dus.

Menddo buorre tinder-bárdni

Holmberg geavaha ain duollet dálle deitenáppaid dego Tinder. Son ásai Roavvenjárggas, go luđii áppa vuosttas geardde iežas telefovdnii ja deaivvai doppe gánddain, gii lei Oulus eret. Buot orui mannamin bures dassážii go fuobmáiga, ahte leaba fulkkežat.

– Son orui hui čáppa ja vehá boarrásut, ja de jearai, ahte go mus lea nu earenomáš namma, ahte leango davvin eret. Mun ahte na juo, lean Ohcejogas ja de son logai susge lea sohka Ohcejogas ja aiddo lei leamašan áhkus hávdádusain doppe. Son jearai mu sohkanama, ja ilmmai ahte su eatni sohkanamma lea maid Holmberg.

– Munnos ledje hui buorit ságastallamat ja son lei áidna geainna ledjen duostan ságastallat. Mo sáhttá leat vejolaš, ahte muhtin oululaš čáppa gánda lea sihkkarit fuolki, čaibmá Áile-Risten Holmberg.

Guldal olles jearahallama ja eambo ságaid ráhkisvuođas, Tinderis ja guoibmegaskavuođain dán vahku Sohkaršohkas. Sáddagis gulat maiddái guldaleaddjimuitalusa, mii duođašta ahte ráhkisvuohta sáhttá duođaid buollát dán nu gohčoduvvon vuosttas geahčastagas.

Sohkaršohkka lea nuorra rávesolbmuid rádioprográmma, mii sáddejuvvo Yle Sámi rádios juohke duorastaga dii. 17.30–20.00 ja nuppádassii seamma áigge bearjadaga. Sáddagat gávdnojit maiddái Yle Areenas. Sátta gullo Norgga bealde NRK Sámi rádios juohke bearjadaga dii. 19.30–22.00. Sohkaršohka sáhttá čuovvut Instagramas @ylesohkarsohkka.

Varrasamosat: Sápmi

Váldoođđasat

Varrasamosat

Muualla Yle.fi:ssä