Sápmi |

Solju albuma evttohuvvo Teosto-bálkkašumi oažžun

Teosto-bálkkašupmi lea okta davviriikkaid stuorámus dáiddabálkkašumiin.

Solju, Ulla Pirttijärvi-Länsman ja Hildá Länsman
Ohcejohkalaš eatni ja nieidda, Ulla Pirttijärvi-Länsman ja Hildá Länsman guoktá musihkkajoavku Solju lea ožžon olu fuomášumi máŋemuš mánuid áigge. Govva: Solju-joavkku preassagovva

Solju-joavkku Ođđa Áigodat -albuma lea oktan evttohassan dán jagáš Teosto-bálkkašumi oažžun. Bálkkašupmái leat evttohuvvon oktiibuot čieža albuma dahje musihkalaš duoji. Teosto-bálkkašupmi lea juhkkojuvvon jagi 2003 rájes ja dat lea okta davviriikkaid stuorámus dáiddabálkkašumiin. Buot dán jagaš Teosto-bálkkašupmái evttohuvvon albumat ja musihkalaš duojit leat almmustuvvan jagis 2018.

Jus bálkkašupmi oažžu okta albuma dahje musihkalaš duodji, de ruhtabálkkašupmi lea 25 000 euro. Jus bálkkašupmi juogaduvvo máŋgga duoji gaskal, de ruhtabálkkašupmi lea eanemustá 40 000 euro.

Eará evttohasat bálkkašupmái Solju lassin leat Color Dolor albuma Love, Litku Klemetti albuma Taika tapahtuu, Tuomas Palonen albuma Tuomas Palonen, Alex Freeman musihkalaš duodji Under the Arching Heavens: A Requiem, Laineen Kasperi albuma Vihapuheita ja rakkauslauluja ja Sebastian Hilli musihkalaš duodji Snap Music.

Bálkkašumi vuoiti dahje vuoitiid vállje duopmárgoddi, masa gullet diimmá Teosto-bálkkašumi vuoitiguovttos Astrid Swan ja Joona Toivanen ja lassin vel Sibelius-Akademiija professor Tuija Hakkila-Helasvuo ja Nelonen musihkkahoavda Jussi Mäntysaari.

Teosto-bálkkašumi vuoiti almmustahttojuvvo 25. cuoŋománu Musihkkadálus Helssegis.

Varrasamosat: Sápmi

Váldoođđasat

Varrasamosat

Muualla Yle.fi:ssä