Sápmi |

Solju válljejuvvui jagi álbmotmusihkkadahkkin – "Dát lea stuorra gudni, go sámemusihkka lea ožžon saji ja oidnogoahtán"

Duorastaga Etnogaalas bálkkašedje álbmotmusihka, máilmmimusihka ja álbmotdánssa buoremusaid Suomas.

Video: Solju, Hildá Länsman
Solju bálkkašuvvui jagi 2019 Etnogaalas. Video: Yle Areena. Govva: Saku Metsärinne.

Ohcejohkalaš eatni ja nieidda, Ulla Pirttijärvi-Länsman ja Hildá Länsman guoktá musihkkajoavku Solju válljejuvvui Etnogaalas duorastateahkedis jagi álbmotmusihkkadahkkin. Eará evttohasat dán kategoriijas ledje musihkkár Heikki Laitinen ja Tuuletar-joavku.

Hildá Länsman lea rámis go sámemusihkka lea beassan dáid áiggiid oidnosii.

– Dát lea stuorra gudni ja lea máilmmi fiinnis, ahte sámemusihkka lea ožžon saji ja oidnogoahtán. Háliidan giitit maiddái Bafe’s Factory -skearrofitnodaga ja Saura Booking Agency ja olles min fiinna tiima dán ovddas, dajai Hildá Länsman.

Jagi álbmotmusihkkadahkki -bálkkašumi mieđihii Suomen musiikintekijät -searvi. Bálkkašumi geigii jahki dassá dollojuvvon Etnogaala 2017 jagi artista Anne-Mari Kivimäki, guhte muitalii maiguin ákkaiguin jagi álbmotmusihkkadahkki válljejuvvui.

– Dát joavku hukse musihkainis diidamáilmmi, mii bisseha áiggi ja bovde guldaleaddji mátkái davás, iežas muitui ja gillii sihke máttuidis báikái ja boahtte áigái. Dát joavku ovttasta árbevieru ja pop-musihka, ođđa ja boares kultuvrra, maid dat batná oktii miellagiddevaš komposišuvnnaiguin ja jietnamáilmmiin. Guokte earenoamáš jiena gulahallaba ja kommentereba nubbi nuppi ja buktiba muitalusa olbmo lahka vaikko olmmoš ii áddešii giela. Loahppaboađusin lea máilmmiluohká máilmmimusihkka, rámidii Kivimäki.

Solju-musihkkajovkui gullet maid čuojaheaddjit Teho Majamäki ja Janne Puurtinen. Solju lei evttohassan guovtti kategoriijas: Jagi álbmotmusihkkadahkki ja Jagi ođđa artista. Jagi ođđa artista -kategoriijas Solju ii birgen, muhto vuoittu faskii musihkkajoavku Pauanne.

Suoma nubbi Etnogaala ordnejuvvui duorastaga eahkedis Helssegis. Gaalas bálkkašedje álbmotmusihka, máilmmimusihka ja álbmotdánssa buoremusaid. Bálkkašumiin ledje čieža kategoriija, main juohkehaččas ledje golbma evttohasa. Evttohasaid leat válljen olbmuid evttohusaid vuođul.

Solju lea maid EMMA-evttohassan

Soljju musihkkárat leat maid musihkkasuorggi EMMA-bálkkašumi evttohassan etnomusihka luohkás. Soljju Ođđa Áigodat -skearru gilvala dán luohkás njealji eará bihtáin. Skearru gilvala jagi 2018 etnoálbuma luohkás. EMMA-gála dollojuvvo guovvamánus Helssegis.

Ovdal EMMA-evttohassan leamašan earret eará Wimme Saari ja Tapani Rinne ja Ulla Pirttijärvi-Länsman ja Ulda.

Hildá Länsman bálkkašuvvui maid diimmá Etnogaalas

Etnogaala lágiduvvui vuosttas geardde skábmamánus 2017. Dalle Hildá Länsman vuittii Etnogaala Risteys-bálkkašumi.

Risteys-bálkkašumiin čalmmustahtte musihkkadahkki, gii iežas doaimmaidis bokte lea ovddidan kultuvrraid oktii heiveheami ja ovddidan rievtti iežas musihkkii. Válljejeaddjit ákkastalle dalle bálkkašumi addima dainna, ahte Hildá Länsman lea čalmmustahttán luohteárbevieru.

– Son lea bajásšaddan sohkabuolvvaid ráiddus sápmelaš luohteárbevirrui ja huksen oktavuođa dán áiggi máilmmimusihkkii ja maiddái akademalaš musihka dutkamuššii. Son lea bargan sápmelaš soloartistan máŋgga iešguđetlágan stiillaid ovddasteaddjin bálkkašuvvon produkšuvnnain. Dasa lassin son lea loaiddastan iešguđetlágan joavkkuiguin sihke Suomas ja olgoriikkain. Länsman bargu luohteárbevieruin lea fuomášuvvon viidát maiddái medias, ákkastalai Máilmmimusihka guovddáža ráđđehus válljejumis čakčat 2017.

Jagi 2019 Etnogaala sáhttát geahččat Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä