Sápmi |

SomBy-joavkkus oahpes lávlu Miira Suomi almmustahttá vuosttas single MIIRA-joavkkuinis – "Buriin mielain studioi"

Sihke Miira Suomi jearahallama ja MIIRA vuosttas lávlaga "Juovllat leat dál" beassá guldalit dán artihkkala bokte.

MIIRA
MIIRA vuosttas, Juovllat leat dál -single almmustuvvá otne bearjadaga. Govva: Tuupa Records

Vuohččulaš Miira Suomi šattai dovddusin SomBy-joavkkus, mii fas lei stuorra namma sámemusihkkamáilmmis sullii logenar jagi dassá. SomBy-joavku vuittii Sámi Grand Prix -musihkkagilvvu jagis 2009 ja beasai ovddastit Sámi Liet International – unnitlogugielaid musihkkagilvvus. SomBy vuittii dan maid, ja beasaige de maŋŋelaš johtit miehtá Eurohpá.

SomBy-joavku ii leat dál šat leamašan aktiivvalaš moatti jahkái, muhto SomBys oahpes musihkkárat eai leat heaitán ráhkadeamis musihka. Joavkku lávlu Miira Suomi almmustahttá ođđa MIIRA-joavkkuinis otne bearjadaga vuosttas single. MIIRA-joavkkus čuojaheaba SomBys oahpes musihkkárat Juho Kiviniemi ja Oula Guttorm, ja sudno lassin Jussi Isokoski.

MIIRA vuosttas, Juovllat leat dál -lávlla lea sámegielat veršuvdna nappo coverbihttá suopmelaš Tulkoon Joulu -juovlalávlagis, man lea álgoálggus čállán Pekka Simojoki. MIIRA almmustahttá bihtá maid suomagillii.

Miira Suomi lohká, ahte su mielas heivii dál ovdal juovllaid almmustahttit vuosttamužžan juovlalávlaga.

– Lea gal buorre almmustahttit dán lávlaga dál. Leahan dat dieđus earálágan go lea coverbihttá, ja dat bihttá ii leat ovdal báddejuvvon sámegillii, muitala Suomi.

SomBy-joavkku maŋŋá Suomi lea lávlon SápmiGroove-livejoavkkus, muhto dainna joavkkuin eai bádden musihka. Dál dan ođđa joavkku geažil Miira Suomi lea beassan fas studioige.

– Lean leamaš nu buriin mielain dál, go in duođai leat leamašan studios guhkes áigái. Muhto lean gal veháš gealdagasas, mo olbmot váldet vuostá.

Háliida čállit lávlagiid ieš

Miira Suomi lei dán giđa mielde Suuri tyhjyys -nammasaš dánsunteáhterčájálmasas, mas son lávllui davvisámegillii. Son ráhkadii čájálmasa varas ieš golbma lávlaga, čálii sániid ja bijai šuoŋa.

SomBy-joavkku áigge son čálii gal lávllasániid ovttas Milla Pulskain, muhto dál dánsunteáhter-prošeavtta maŋŋá son lea áibba earáláhkai movttáskan lávlagiid ráhkadeamis.

– Muhto dat mu ođđa musihkkage šaddá dákkár poprock-musihkka, dat lea mu vuohki bargat dan musihka.

Dál ii leatge eará go čálligoahtit ođđa lávlagiid joavkku eará lahtuiguin. Vel ii leat sihkkar, goas ođđa musihkka almmustahtto, muhto jáhkkimis farggabáliid, muitala Suomi.

– Sávan, ahte boahtte jagi bealde, muhto in gal duostta vel lohpidit maide dađi eanet.

SomBy-joavku sáhttá vel lávket lávddi ala

SomBy almmustahtii maŋimuš skearru "Viimmat" jagis 2014, ja maŋimuš háve sii lávkejedje lávddi ala jagis 2015. Vaikko joavku ii leat šat moatti jahkái leamašan aktiivvalaš, ii leat dattetge sihkkar, ahte SomBy ii šat goassige čuojahivčče lávddi alde.

– Sáhttáhan dat leat, ahte mii doallat muhtin nostalgiijakonseartta, sávvamis. Ferte jearrat earáin, boagusta Miira Suomi.

Jietna: sohkaršohkka
Jietna
Guldal Miira Suomi jearahallama ja MIIRA vuosttas single "Juovllat leat dál" Sohkaršohkka-sáddagis (jearahallan álgá áiggis 21:52 ja musihkkabihttá áiggis 30:23)

Varrasamosat: Sápmi

Váldoođđasat

Varrasamosat