Sää´mjânnam |

Son euʹnnad vueiʹvvgååradvuuʹd rännaz seeiʹnid sääʹmeeuʹnivuiʹm – ǩii lij graffittčeäppneǩ Sámi Hustler?

Nuõrttsäʹmmlaž graffitičeäppneǩ Sámi Hustler kälkkeeškuõʹđi vueiʹvvgååradvuuʹd uuʹlcid nuõrttsäämas. Koovvinees son haalâd kaggâd paajâs saaʹmi vuõiggâdvuõđid.

Sami Hustler
Sámi Hustler nõõmin tuåimmi grafittčeäppneǩ haalâd leeʹd õinn anonyym artistt. Govva: Sámi Hustler

Eeʹjj aalǥâst vueiʹvvgååradvuuʹdest uuʹlec jooʹđi vueiʹv jåårǥle. Rännaz betoonseeiʹnid iʹlmstâʹvve čuõʹvves eeuʹnivuiʹm tuejjuum graffittiid, leʹbe seiʹnnkälkkõõzz.

Sääʹnn "Hustler" lij kälkkääm sääʹmeeuʹnivuiʹm da kõõskâst vuäitt vueiʹnned säʹmmlaid tobddâz teemm. Alggmeerai vuõiggâdvuõđi kuõskki ILO-169 mošttad ǩiõčči säʹmmlai vuõiggâdvuõđin.

"Tiõrv mon leäm Hustler"

Sámi Hustler graffitt-tuâj lie vueiʹnnemnalla še Instragramist. Sosiaaʹl media pääiʹǩ šâdd jåttlânji ouʹdde, što tät anonyyman tuåimi čeäppneǩ lij nuõrttsäʹmmlaž. Son ǩeeʹrjat kooʹvines vuâlla säämas da čuäʹjat čeäppõõzzees nuõrttsääʹmǩiõʹlle.

Äʹlšš graffitt-tuâjaid vuõʹlji tän eeʹjjest ođđsest jottu, ko Hustler haalii juʹn säʹmmlažvuõđ puʹhtted ouʹdde jiijjâs tuâjai pääiʹǩ.

– Graffitt lij pâi leämmaž čâđđmam ââlda, håʹt jiõm tuejjääm-i tõid kuʹǩǩ ääiʹj. Tän eeʹjj aalǥâst kaaunim tõn ääʹlš ođđsest, ko smiõttem mäʹhtt vuäitam puʹhtted ouʹdde muu nuõrttsäʹmmlaž preeddan da mättʼtõõllâd lââʹzz muu jieʹnnǩiõl. Tuʹmmjim, što lââʹzztam "sääʹmtagiid" da raajškueʹttem grafiittid še nuõrttsäämas, mušttal Hustler.

Saami Hustler
Alggmeerai vuõiggâdvuõđ da sääʹmpolitikk pueʹtte juõʹǩǩ čeäppõõzzâst ouʹdde Sámi Hustler tuâjain. Govva: Sámi Hustler

Vuõssmõs grafitt šõõddi juʹn pââibužškooulâkksiʹžžen. Teʹl son kälkkii koolm bukva vuämm strooiʹtel seäinna poojâsǩeäinn kuâŋŋsest.

Hustler čeäppõõzz lij vueiʹnnemnalla pâi vueiʹvvgååradvuuʹdest, leâša mõõʹnni ǩieʹzz son piâzzi tuåimted õõut graffitt-tuâj še Riddu Riđđu -festivaaʹle.

– Tät lij muʹnne äʹlšš kälkkeed graffittiid. Haaʹlääm, što nuʹt määŋgaz ko lij vueiʹtlvaž vueiʹnči muu tuâjaid. Leʹčči še fiinn äʹšš, što vuäitam tuâjainan jeärben nuõrid älšmâʹtted leeʹd kuärǥast siʹjji sääʹmpreeddin, mušttal Hustler.

Sámi Hustlerin graffiti
Tän räjja suu tuâjaid lij vueiʹtlvaž vueiʹnned vueivvgååradvuuʹdest da Instagram pääiʹǩ. Govva: Sámi Hustler

Ǩiõll tuejjad veâl vaiggâdvuõđ – niõǥǥõʹssân mättjed jeänab nuõrttsääʹmǩiõl

Nuõrttsääʹmǩiõl âânnmõš graffittiin lij leämmaž Hustler mieʹldd positiivlânji še kåčč. Čeäppneeʹǩǩest leʹčči jiânnai juurd, mâiʹd tuejjeed da kälkkeed, leâša ǩiõʹlle ij vuäǯǯ nuʹt hiâlpad vieʹǩǩ.

Suʹst lij-i miõlâst mättʼtõõllâd jiijj sooǥǥ ǩiõl da tuejjeed jõnnsab projeʹktt, kååʹtt ǩiõttʼtââll teemm jeänab.

– Tät projektt veâl hauddââtt muu seʹst, leâša juʹrddjen lij puʹhtted ǩiõl nâânääb ouʹdde uuʹlcin. Nuõrttsääʹmǩiõl mättʼtem lij sami vääžnai äʹšš muʹnne, leâša še vaiggâd. Kuuitâǥ tät ǩiõl mättʼtõõllmõš lij muu õhtt täävtõs, mušttal Hustler.

Ââʹn son lij siõmmnai siõmmnai mättʼtõõllâm saaʹnid säämas da tobdstõõttâm jiijj ääkk leuʹddjid. Kuuitâǥ ǩiõll mättʼtõõllmõš måtmešt ouddân meälǥžet.

– Måtmešt muʹnne šâdd miõʹlle idea, koon haaʹlääm kälkkeed. Jiõm silttad ǩiõl, nuʹt vuäitt mõõnnâd kuʹǩǩ ouddâl ko vuäǯǯam vaʹsttõõzz da vuõigg sääʹn nuõrttsäämas, mušttal Hustler.

Pueʹrmõs lij, jos oummu årstâʹtte graffittiid luuzz

Tän räjja son haalâd põõššâd anonyyman. Graffittkälkkõõzzi raajtummuš lij Lääʹddjânnmest lääʹjjteʹm, håʹt jeärben gååradvuuʹdin tõid uuʹlcin kâʹl vuäinn õinn jeänab da jeänab.

– Plaanummuž mottai jiânnai, leâša ââʹn leäm jeänab tuejjääm grafitt pääiʹǩ ool da jeänab "improvisâʹsttam", ko plaanääm.

Sámi Hustler
Sámi Hustler vuäinn, što grafiitt lie tän ääiʹjest jeänab priimmum oummui kõõskâst ko ouddâl. Grafiittin väʹldded še bieʹll õhttsažkååʹdd aaʹššid, son vuäinn. Govva: Sámi Hustler

Graffitt-tuâj lie tän ääiʹjest šõddâm jeänab takai äʹššen, ko pâi seeiʹnid kälkkuum certtmõõžž.

– Tän ääiʹjest lie puättam jiânnai nåkkam lääǥǥlaž seeiʹnid, koozz vuäitt kälkkeed friijâld. Grafittčeäppniiʹǩǩin lie še tiʹllʼjum jiânnai jõnn seiʹnnmuraalid da grafiitt lie piâzzam jõnn tääʹzz čeäppõsgalleriaid, smeâtt Hustler ânnʼjõž peeiʹv graffitttuâjaid.

Suʹnne pukin vääžnjummuž lij, što oummin šâdd måtamnallšem juurd grafittkoovvin.

– Täävtõs lij årstâʹtted oummid da puʹhtted ouʹdde toobdid, son särnn.

Varrasamosat: Sää´mjânnam

Váldoođđasat

Varrasamosat