Sápmi |

Son lea neavttašan ovttas Åke Lindmanin ja Bjørn Sundquistain - Sáhtálin velge vuolgit fárrui

Ohcejohkalaš Issát Sara, Ovlina Issát, lea neaktán viđa filmmas ja maid Rávgoš-teáhtera čájálmasas.

Issát Sara lea neaktán Paul Anders Simma filmmain.
Govva: Kuva: Outi Paadar /Yle

Ohcejogas leat máŋggat neavttárat. Okta sis lea Ovlina Issát, Issát Sara guhte lea neaktán filmmain ja maid teáhterčájálmasas.

Issát Sara lea ealáhahkii báhcan oahpaheaddji, muhto lea maid geargan neaktit viđa filmmas gaskkal 1988-2000.

Son jurddaša ahte neavttašanbottut váikkuhedje positiivvalaččat su oahpaheaddji bargui.

– Oahpaheaddji barggus lei muhtumin buorre beassat eret ja bargat earáge. Dat dagai buori ieš oahpaheaddji bargui, go oaččui viidásit oainnu ja viidáseappot álggii jurddahallat eallima birra, lohka Sara.

Vuosttas filmmat báhcán buoremusat millii

Issát Sara lea neaktán Paul Anders Simma filmmain.

– Dat lea dakkár filbmadahkki, gii lea mu bivdán máŋgii fárrui neavttárin, mojohallá Sara.

Vuosttas guhkes filbma mas son lea fárus, lea Dobbelis ija ja Beaivvi (1988). Filbma muitala árbedieđu sirdašuvvama birra, go áddjá ja nuorra gándalunta gárttaiga guovttá báhcit meahccái.

– Dashan bohte stuorra váttisvuođat álggos, muhto loahpas áddjá ja bárdni gávnnadeaba, nu ahte filbma nohká vuohkkasit, čilge Sara filmmas mii lea bures báhcán su millii.

Guovža -filmma (1994) giehtačálus vuođđuduvvá nuortasámiid álbmotmáidnasii. Das nieida ráhkásmuvvá bárdnái, gii sáhttá jorrat guovžan. Nieidda áhčči ii dohkket lihtu ja bivdigoahtá guovžža. Nieida oažžu guokte earálágan máná.

– Dan dat Paul Anders govvii doppe Suoločielggis, muitala Sara.

Guovža -filmma nieidda, Saara, rolla neaktá Irene Länsman ja Matti Onnismaa neaktá guovžža rolla. Issát Sara neaktá Saara áhči rolla.

Ruovttugili muitalusas neavttárin

Sara lea neaktán bálkkašuvvon komediija Ságojoga minister -filmmas (1997), man inspirašuvdnan leamaš su ruovttugili, Lismmá, fearán soađi maŋŋá 1940-logus.

– Álgobáliid dat giehtačálus galggai leat Lismmá ministera muitalusa vuođul, muhto go Simma de álggii dan čállit, de dathan viidánii nu ahte das fertii namage molsut. Nu ahte de šattai Ságojoga minister, muitala Sara.

Das son neaktá suhttan Biette rolla ja Erik Kiviniemi neaktá váldorolla Seppo Rävmark alias Perti Lohikoski. Norgga beale dovddus neavttár Bjørn Sundquist čájáhalai gávpejas Antti Neia rolla. Sundquist neaktá maid Stockfleth rolla Guovdageainnu stuimmit -filmmas (2008).

Ságojoga minister vuittii guokte Jussi bálkkašumi buoremus lávdeplánas ja biktasiid ovddas.

Lismmá ministera birra lea báddejuvvon suomagielat lávlla ja dan sáhttá guldalit Tarinoiden Inari -siiddus.

Iskko-Máhte máinnas (2000) lea oanehaš ráhkesvuođa muitalus, man filbmejedje Girona guovllus. Das Sara neavttašii ovttas dovddus suopmilaš neavttárin, Åke Lindmanin.

Issát Sara lea neaktán ovtta Rávgoš-teáhtera čájálmasas, man Kirste Paltto lea čállán. Girill von Dáktelus (1999) muitalii gyrodactylus salaris luossadihkis.

– Dat lea áidna teáhtera rolla man mun lean jođihan, dadjá Sara.

Vuolggašii ain neaktit

Sus leat báhcán buorit muittut filbmamáilmmis.

– Oahpásmuvven hui máŋggalágan hearvás olbmuide ja bessen maiddái čájáhallat beakkán neavttáriiguin dego Lindman ja Sundquist, lohká Sara.

Neaktima áigge sutnje čielggai makkár erohus lea filbmaneaktima ja teáhterneaktima gaskka.

– Álgoáigge teáhterolbmot badjelčájáhalle filmmas ja dat ii leat buorre ášši filbmamáilmmis ja dan birra bagadallit váruhedje muge, čilge Sara.

Teáhterbarggus leat iežas buorit bealit.

– Das galgá dakkár oažžut oktavuođa gehččiide. Dat teáhterbargu eallá lávddi nalde: juogo eallá dahje jápmá.

Filbmabarggus fas lea nu ahte jos ii hommá mana bures, sáhttá váldit ođđasit ja ođđasit.

– Gehččen televišuvnnas ovtta dokumeantafilmma Marilyn Monroe birra. Dat lei okta unna bihttá filmmas, man bagadalli válddii 86 iešguđege geardde ovdalgo bagadalli dohkkehii dan.

Sara ii leat šat eambbo neaktán guhkes áigái. Guktot suorggit gáibidit stuorra hástalusa.

– Dál eai leat boahtán fálaldagat, muhto jos bohtet de sáhtálin velge vuolgit fárrui, loahpaha Sara.

Varrasamosat: Sápmi

Váldoođđasat

Varrasamosat

Muualla Yle.fi:ssä