Sápmi

Sosiála media bokte fáhte álbmoga ain jođánabbot – someváikkuheaddjit leat dál oassin Suoma stáhta kriisadieđiheami

Emmi Nuorgam
Someváikkuheaddji ja áššedovdi Emmi Nuorgam oaidná, ahte some bokte fáhtet olu buorebut olbmuid. Govva: Juuli Aschan

Suoma stáhtaráđđi válddii someváikkuheaddjiid fárrui juohkit álbmogii rivttes dieđu koronavirusa dagahan kriisadilis.

Kriisadilis diehtodulvi ja maiddái ođasgoiku lea garas . Koronavirusa leavadettiin olbmot ohcet dieđuid ja rávvagiid epidemiijas sihke eiseválddiid neahttasiidduin ja dieđihangaskaomiin.

Dálááiggis goittotge soaitá sosiála media leat dat beaktilamos vuohki fáhtet álbmoga. Sosiála medias doaibmi váikkuheddjiin soitet leat logit duháhat olbmot čuovvumen.

Dán dihtii maiddái Suoma stáhtaráđđi lea váldán someváikkuheaddjiid fárrui dieđihit álbmogii rivttes dieđu koronavirusa dagahan kriisadilis.

Someváikkuheaddji ja dieđiheami áššedovdi Emmi Nuorgam oaidná, ahte eandaliige dál koronavirusa dagahan dilis someváikkuheaddjiin lea váikkuhanváldi.

– Sosiála medias vuhttui bures dat, ahte panihkka leavai koronavirusa dihtii. Dalle dán lea hui váttis šat doalahallat, jos eiseválddiid dieđiheapmi ii doaimma doppe, gos olbmot leat, oaidná Nuorgam.

Sosiála medias hállojuvvo giella, man álbmot ádde

Stáhtaráđđi, Suoma mediaid ovttasbargodoaibma Mediapool ja váikkuhanáššedovdiid fitnodat PING Helsinki ovttasbarget dál dán ovdii, ahte eiseválddiid dieđiheapmi jorgaluvvo sosiála media gaskaomiid bokte dakkár gillii, man álbmot ádde.

Álo go Stáhtaráđđi dahje stáhtaministtar Sanna Marin addá rávvagiid dahje njuolggadusaid koronaepidemiija áigge, dárkkuhussan lea figgat muitalit sisdoalus someváikkuheaddjiide dákkár gielain, ahte dan sáhttá álkit juogadit duháhiidda olbmuide.

Ovttasbarggu ulbmilin lea maiddái lebbet fáktádieđuid.

Nuorgam mielde stáhta dieđihangaskaoamit eai leat álbmogii vuosttas báikkit, gos sii gávdnet heahtedilis rivttes dieđuid.

– Suomasge leat hui olu váikkuheaddjit, geat fáhtejit sisdoaluinis seamma olu olbmuid go vaikko Suoma stuorimus aviisa Helsingin Sanomat, dahje eanangottiid aviissat ja radiot. Sin čuvvot hirbmat stuorra olmmošjoavkkut. Máŋgasiin soitet leat juobe čuođit duháhat čuovvut, muitala Nuorgam.

Person använder Instagram på mobilen
Sosiála media váikkuheaddjin lea stuorra rolla rivttes dieđu juohkimis kriisadiliin. Govva: Mostphotos/ Panithan Fakseemuang

Somes maiddái dieđu ádde buorebut go dieđihandilálašvuođain, oaidná Nuorgam.

– Olbmot váldet dieđu eará láhkái vuostá sosiála media bokte. Dál háliidit gullat varraseamos dieđuid sis, geaid dábálaččatge guldalit ja geaid ságaid lohket, dadjá Nuorgam.

Medialohkandáidu nanosmuvvá kriisa áigge

Jos sosiála medias muhtun geavaheaddji lea bivnnut, sus leat olu vejolašvuođat gulahallat iežas čuovvuiguin. Váikkuheaddjit besset njuolga ságastallat eará geavaheddjiiguin. Ná sii besset nannet bures eiseválddiid muitalusa dás, mo álbmot galggašii doaibmat dákkár eahpedábálaš áiggiin.

Dás Emmi Nuorgam lea maiddái fuomášan olu ovdáneami. Olbmuid krihtalaš medialohkandáidu lea nanosmuvvan.

– Olbmot leat somes hui gozuid alde. Lea leamaš fiinnis oaidnit, mo olbmot reagerejit dasa, jos gii nu lebbe boasttudieđuid. Sutnje dadjet, ahte ále viša juohkit dakkár dieđu, mii ii doala deaivása. Dás lean hui rámis, dadjá Nuorgam.

Varrasamosat

Muualla Yle.fi:ssä